WILLEMSTAD.- E super talento Arubano, Jeon ta bolbe logra pa un di su komposishonnan bira e ‘Kantika di Siman’ di Extra.
Korant Extra huntu ku Skempi tur siman ta skohe un kansion ku ta kousando impakto i ta hopi skucha riba e website di Skempi.
Pa e siman aki ‘60’ ta e kantika di siman. No solamente pa su ritmo, pero e kontenido di letra ta algu ku bo mester para ketu na dje. Un tremendo komposishon kaminda e kompositor ke pa ‘Ora mi yega 60, mi ke wak patras i bisa bale la pena’.
“No ta paso bida ta kòrtiku nos ta keda zonder, t’asina tin ku drai maske ta den rotònde, e ‘system’ tin nos wowo mané Stevie Wonder, Ora mi yega 60, mi ke ta mihó.
Jeon ta kanta e realidat di kualke persona ku ke yega 60 i mira ku el a logra tur su metanan.
Un dje kosnan mas importante ku Jeon a hasi menshon di dje den su komposishon ta ku ‘En bes di bringa otro, nos tin ku uni. Bo tin ku pordoná, lubidá i laga bai, mundu ta sigui drai’.
Un tremendo komposishon ku e siman aki ta keda pone den spòtlait pa EXTRA i SKEMPI.
Bishitá e website di EXTRA, www.extra-v2.mystagingwebsite.com i na bo man drechi bo ta haña e poster di ‘Kantika di Siman’, klik riba dje i disfrutá di “60”!.