WILLEMSTAD.- Giovanni i Angelica di Kara Productions ta konosí pa produsí obranan di arte masha bunita. Den temporada di Karnaval esaki no ta un eksepshon. Aparte di traha e korona pa Prens i Panchonan, e duo dinámiko di Kara Productions e aña aki tin enkargo pa produsí diferente karosa pa Karnaval 2020 i tambe e Rei Momo.
Angelica a kuminsá splika ku Kara Productions ta trahando riba diferente karosa pa gruponan di Karnaval i pa Fundashon JAG, entre nan un karosa hopi spesial di Selikor pa tur e reinanan ku a keda koroná durante 50 aña di Karnaval.
Giovanni di su parti a indiká ku e karosa pa Reina Hubenil lo keda mantené e tema di Sirko meskos ku e elekshon. Riba e karosa lo tin e Reina i su finalistanan.
E karosa pa Reina Adulto lo hiba e tema ‘Un Karnaval pa futuro’. E karosa lo tin un kantidat di sírkulonan di bida, un kantidat di sirkulo koló kòrá, blanku, plata i oro.
Pa finalisá Giovanni Abath a bisa ku e Rei Momo di 2020 lo ta di gala, bisti den un ‘smoking’. E Rei Momo lo tin 8 meter di altura, esun di mas grandi di tur tempu!.