WILLEMSTAD.- Pa Fundashon JAG por a organisá Karnaval di Kòrsou nan a konta ku un supsidio di Gobièrnu di Kòrsou di primeramente 350 mil florin i den un di dos tanda a risibí tambe 75 mil florin for di fondonan di Ministerio di Ekonomia.
Gastunan pa organisá Karnaval a resultá di ta 576 mil 592 florin, danki na e supsidio i na spònsernan ku a kere den Fundashon JAG ku e organisashon a logra di risibí 237 mil 243 florin na aporte di spònsernan.
For di e montante total di entrada ku tabata 662 mil 243 florin a paga tur gastu di Karnaval i a keda ku un saldo positivo di 86 mil 954 florin ku 92 sèn.
Sr. Juni Aniceta tabata masha kontentu ku e organisashon a logra di kubri tur gastu i keda ku un saldo positivo.
Pa por a logra esaki e organisashon a traha ku 2 accountant kendenan huntu ku e tesorero di Fundashon JAG, Sra. Glenda Aniceta a hasi un trabou estupendo.
Miembronan di Fundashon JAG a disidí ku pa organisá Karnaval 2018 nan no ta kobra pa e trabounan hasí.

PREMIASHON
E surplus di kasi 87 mil florin a keda repartí bou di gruponan di Karnaval na momentu ku a hasi entrega di premio pa e diferente kategorianan i tambe gruponan di aña.
Ayera tardi despues dje presentashon dje relato finansiero na prensa Fundashon JAG a hasi entrega di e relato finansiero na e representante di sektor di Kultura di Gobièrnu di Kòrsou.