WILLEMSTAD.- Temporada di Karnaval 2020 ta tras di lomba i ‘DEN E BEMBE’ ta kere ku definitivamente tin algun punto ku mester di aklarashon, mester traha un plan pa futuro i mester kuminsá plania for di awor.
Na promé lugá nos mester ta kontentu ku nos por a selebrá un temporada di Karnaval kaminda no tabatin kasonan kaminda ku mester a lamentá. Un temporada kaminda ku públiko a demostrá ku nan por komportá i ku mirando e resúmen di Polis nos tin ku ta satisfecho ku e resultado.

FUNDASHON JAG
Pa loke ta trata e organisashon, e aña aki Fundashon JAG a enkontrá basta kontratempu, pero tin algun ku nan mes ta responsabel pa esaki. E kantidat di insertidumbre ku tin relashoná ku problemanan interno den e organisashon i su ‘sup kontratistanan’ a pone un mancha skur. Informashon ku tin ta sirkulá ku tabatin mal maneho finansiero ta hasi e situashon aun pió.
Fundashon JAG mester duna un aklarashon riba e puntonan aki pa dje forma ei risibí e konfiansa bek di pueblo. Manera kos ta mustra aworakí, mi no ta kere ku lo mester duna nan benefisio di duda sin ku un relato finansiero keda presentá i ku esaki ta aprobá pa un akountent rekonosé.
E echo ku tin duda riba e uso di e supsidio di Gobièrnu pa kubri debenan habri ta hasi daño na nòmber dje organisashon. Nos ta konsiente ku Fundashon JAG no tin splikashon di duna na pueblo, pero nan mester por responsabilisá e uso dje supsidio di Gobièrnu na sektor di Kultura ku di su banda mester por duna aprobashon na esaki.

AGKK
Asosashon di Gruponan di Karnaval di Kòrsou segun ‘DEN E BEMBE’ su aporte na desaroyo di Karnaval mester bira un mas grandi. E asosashon tin ku duna empuhe i sosten na gruponan ku meresé esaki. Nan mester por evaluá i mira kua te gruponan ku meresé sosten. Ta AGKK sa adelantá kuantu grupo tin pa kada marcha i ta nan mester por bati alarma adelantá pa por saka un mas i yuda e gruponan aki. Definitivamente nan mester ta mas embolbí i yuda pa engrandese nos Karnaval. Forma parti di e grupo di ‘stakeholder’, pero no fasilitá informashon ta hasi e situashon mas difísil pa manehá.

MARCHA HUBENIL
Mester evaluá Marcha Hubenil i krea e posibilidat pa inkluí sentronan di bario i òf skolnan pa forma parti dje marcha. Traha adelantá ku skolnan ku ta interesá i aserka organisashonnan manera T'aki Tin ku anualmente ta organisá evento i ta duna su sosten finansiero na e gruponan via di e organisadó di Karnaval. Mester por tin un ‘Tim kreativo’ ku ta traha diferente diseño ku por keda usa i ku gastunan pa realisá esaki ta abou pa dje forma ei bo yuda gruponan òf skolnan ku ke partisipá.

PARADA DI TINER
E aña aki tabatin henter un diskushon. ‘DEN E BEMBE’ a keda informá di diskushon den seno di skolnan mes pa loke ta trata nan partisipashon si òf no na e Parada di Tiner. Mester evaluá for di aworakí e motibu dikon skolnan no a partisipá mas i buska manera pa por yega na un solushon pa nan partisipashon por bira posibel. Si ta animashon musikal ta hunga un ròl, huntu ku Fundashon JAG i òf Gobièrnu mester por logra ku ta yuda na kubri gastunan di banda i òf dj.

GRAN MARCHA
Nos Gran Marcha tabata tremendo pa loke ta kreatividat, partisipashon i animashon musikal. Mester traha riba orarionan i trese un proposishon adelantá na Gobièrnu/ Kuerpo Polisial pa yega na un akuerdo fo’i trempan. Kuenti warda aña bòltu pa djei e mesun diskushon ku ta haña dia liber si òf no bin riba mesa no te kos!. ‘DEN E BEMBE’ a gosa un proposishon ku awe a keda pone riba retnan sosial kaminda ta proponé pa wak un dje otro dianan liber ku Gobièrnu ta duna durante aña i pa kambia esaki ku e djamars di despedida i te hasta djárason di shinishi.

KARNAVAL DI BANDABOU
Karnaval di Bándabou a haña un rosea e aña aki, pero ta keda un punto di preokupashon ku ta solamente dos aktividat ta keda ‘kumpra’ dor di Gobièrnu. Ámbos produkto, e marcha di skolnan i tambe e Marcha di Bándabou meresé atenshon i mester traha tambe riba nan desaroyo. Skolnan di e área di Bándabou mester forma parti dje desaroyo aki.

PRODUKTO TURISTIKO
Finalmente nos selebrashon di Karnaval ta un tremendo produkto turístiko ku nos mester sigui desaroyá pa e por trese un ‘spin off’ ekonómiko mas grandi pa Kòrsou. Un investigashon den esaki tambe ta na su lugá.