WILLEMSTAD.- Un biaha mas lo keda komprobá ku Karnaval T’aki e ta Biba!, na EXTRA, e number 1. Kuminsando mañan mainta 8’or via di e plataformanan di EXTRA ku ta www.extra-v2.mystagingwebsite.com i tambe via nos página di facebook ‘Extra Curaçao’ lo bo por sigui e transmishon bibu di Zomercarnaval for di Rotterdam, Ulanda. ‘Rotterdam Unlimited’, bou di kua e Zomercarnaval ta keda organisá ta un evento ku anualmente ta atraé kasi 750 mil bishitante tantu lokal i internashonal. Durante di 5 dia largu e sentro di siudat di Rotterdam ta keda kombertí den un sentro di selebrashon ku konsiertonan, demostrashon di baile, fiestanan i yen evento mas ku tin e diversidat kultural komo e punto sentral. Rotterdam konosé 174 diferente kultura i nashonalidat di kua tur tin nan tradishon riba e área di kultura i arte. Tur e ‘vibenan’ aki huntu ta pèrkurá pa géneronan nobo di músika, baile i arte. E transmishon for di Ulanda ta keda produsí pa Fundashon J.A.G. i presentashon lo ta na enkargo di Sandra Kooij i dj ‘The One’, miéntras ku kámara lo ta na enkargo di e konosido Adonis Borgschot. E punto di transmishon lo ta na altura di ‘Supermarkt Coop’ riba Nieuwe Binnenweg. Mañan mainta biba Zomercarnaval bibu bibu via e plataformanan di EXTRA.