WILLEMSTAD.- Ku hopi satisfakshon Kiwanis Club Curaçao ta wak bek riba un eksitoso Karnavalika e aña aki atrobe. Pa mas di 25 aña Kiwanis Club Curaçao ta spònser e fiesta di Karnavalika pa e klientenan di Totolika ku nos ta yama Karnavalika. Tur aña e fiesta ta wòrdu organisá e djabièrnè promé ku marcha di mucha. For di 6’or tur e klientenan ta bini e sede di Totolika na Uteweg i akinan nan ta pasa un ratu hopi kontentu baliando riba tononan di un dj i un brasbènt. Kulminashon di e fiesta mayoria di biaha ta ora Rei di Tumba bishita e aktividat i kanta huntu ku tur e hóbennan aki e piesa ganador. E aña aki no tabata otro i ora Rei di Tumba a presentá tur hende a bira loko loko. Manera e tumba ta bisa tur hende a bira “Sende, Sende”.
Pa Kiwanis Club Curaçao ta un satisfakshon enorme pa por spònser e fiesta aki ya ku e satisfakshon ku bo ta mira den e kara di e hóbennan aki ta asina grandi ku bo no por paga ku plaka. E alegria i entusiasmo ku nan ta kontagiá bo kuné ta grandioso. Miembronan di Kiwanis Club Curaçao mayoria di biaha ta fungi komo hurado tambe pa saka e hóben ku e mihó trahe. No Semper esaki ta mesun fásil.  Kiwanis Club Curaçao ta kontentu di por a bolbe kooperá i asina trese alegria den un grupo di nos hendenan ku sigur meresé esaki.
Kiwanis  Club Curaçao no ta kansa di bisa ku tur esaki ta posibel danki na e sosten spontáneo ku ta haña di nos pueblo ku ta koperá ku tur fundraising ku nan ta organisá.
Sharalin Passial, Presidente di Kiwanis Club Curaçao ta gradisí un i tur ku a kooperá i ta deseá henter pueblo di Kòrsou un felis Karnaval. Potrètnan pa kortesia di Anthony Haile.