KRALENDIJK.- Habitantenan di un sierto área di Nikiboko ta sintá ku un dilema grandi i serio. Nan ta puntra nan mes ku si tin un òf mas restorant na Boneiru ta kushiná karni di buriku pa bende ku nan klientenan? Òf ku ta sierto supermerkadonan ta bende karni di buriku pa konsumo humano òf komo kuminda pa kachó? Fin di siman reporteronan di Extra a topa ku un situashon ku ta lanta pregunta.

Un habitante di Nikiboko ku ta preferá pa no identifiká su mes públikamente a tuma kontakto ku e korant aki pa kompartí su preokupashon. Loke ta sosodé ta ku desde yanüari último su kachónan, despues ku nan sali, ta yega bèk kas ku pata i wesu di buriku.

"E kos a kuminsá na luna di yanüari último. Mi no a preokupá masha i tabata usa saku di plèstik komo hanskun pa kue nan i tira den kònteiner di sushi òf pafó di kurá. Pero e kos a sigui e lunanan despues i awor sí mi a kuminsá pensa seriamente ku lo ta trata di restunan di buriku ku nan a mata i soya pa haña e karni", e persona a splika reporteronan di Extra.

Di akuerdo ku e persona, inisialmente el a pensa ku kisas ta un buriku ku a muri den besindario e kachónan tabata habraká fo'i otro. Pero mester tene kuenta ku ta fo'i yanüari e fenómeno a kuminsá i te ainda nan ta bini ku pata di buriku fresku kas. I un buriku tin solamente kuater pata.

E persona a sigui konta: "Banda di pata, e kachónan ta kana rònt den besindario di mi kas tambe ku wesu di lomba di buriku." Pa proba ku loke e ta bisa no ta imaginashon, riba petishon di Extra, e persona en kestion a kue un pata i algun wesu fresku pone den un hèmber chikí pa ilustrashon. No tin duda ku ta trata di restunan di buriku. Sigur na e para (huf) ta rekonosé esaki. Ta trata ku pata i wesunan fresku ku e kachónan a trese kas djabièrnè último.

Ta opvio ku e asuntu aki ta hala atenshon. Riba su  mes ta normal ku den eksterior sa mata buriku pa duna kachó kome. Pero tambe ta konosí ku sa alimentá animalnan salbahe di sirko, manera tiger i leon, ku karni di buriku. Asta pa konsumo humano nan ta bisa ku karni di buriku ta apropiá, manera por lesa riba Internèt. Pero tòg e situashon deskribí den e artíkulo aki ta keda yen di interogante i ta rekerí un investigashon di instansianan gubernamental i kisas te asta hudisial. Reporteronan di Extra a pidi e persona ku a trese e kaso aki na publisidat pa e no tira e último pata i wesunan ku su kachónan a trese kas djabièrnè.