WILLEMSTAD.- Kas di Kultura, manera tur aña ta habri temporada di Aguinaldo i Tambú ku un presentashon di tur e gruponan ku ta aktivo. E aña aki apertura pa e gruponan di  Aguinaldo ta dia 21 di òktober 2018 i e apertura pa e gruponan di  tambú ta dia 28 di òktober 2018. Tur e dos aktividatnan ta tuma lugá na Plasa Brion.
Djaweps 18 di òktober 2018 lo tin un reunion informativo pa tur gruponan di Tambú i Aguinaldo. E reunion aki ta tuma lugá na Kas di Kultura, Scharlooweg # 29, pa 7 or di anochi.
Dos representante di kada grupo ta keda invitá pa tei presente pa haña informashon serka entre otro funshonario(nan) di Kuerpo Polisial. Nan lo tei pa duna informashon di e reglanan nobo pa loke ta trata pèrmit di Tambú i Aguinaldo pa aña 2018. Riba e anochi aki gruponan ta haña oportunidat pa ranka number pa loke ta trata nan presentashon riba sea dia 21 òf 28 di òktober 2018.
Kas di Kultura ta hasi un petishon na tur grupo di Tambú i Aguinaldo nobo, pa bin registrá na Kas di Kultura i haña informashon balioso pa nos por garantisá un temporada di Aguinaldo i Tambú eksitoso. Kultura e Motor pa Desaroyo Duradero!