KRALENDIJK -- Un pregunta
importante den e kaso Drum,
ku a enserá morto di e agente
polisial Ferry Bakx dia 17 di
ougùstùs anochi, ta for di kua
arma e balanan mortal a sali.
Anke ku tabata trata di un kaso
pro forma, por a haña algun
detaye interesante tokante e
suseso aki, ku a konmové e
komunidat boneriano. Tabatin
sigur tres arma di kandela den
wega, esta un Glock, un Berreta
i un Walter PK, ku ta arma
reglamentario di polis.
Mas i mas e desaroyonan
den e kaso aki ta bayendo den
direkshon di e pregunta klave
di ken a tira Bakx i kua arma
tabata embolbí. Tin tres di e
akusadonan venezolano ku a
bisa ayera den korte ku nan a
partisipá den e ladronisia ku
violensia na kas di famia Van
Dijk den Sabadeco Shores, pero
no ta tur a tira. Tres di nan no
a papia ayera.
Un di e akusadonan a bisa
ku ainda no a definí e arma ku
a usa pa tira Bakx.
“Públikamente mi ke ofresé mi
diskulpa na famia di e polis,
famia di doñonan di e kas,
pueblo boneriano i gobièrnu
di Hulanda pa loke a sosodé.
Ta duel mi loke a pasa. Awor
aki mi ta 100% arepentí. Pero
mi ta kere ku mester definí e
arma for di kua e balanan ku a
mata e víktima a sali.”
Un otro akusado a bisa:
“Mi tambe a partisipá den e
insidente i ta lamentá loke a
sosodé. Mi tambe tabatin un
arma di kandela dirigí riba e
polis. Mi a hasi esaki pa gana
garantia pa bai for di e sitio,
pero mi no a tira. P'esei mi
abogado a pidi pa un
rekonstrukshon di e insidente.
Mi arma no a partisipá den e
tirunan ku kai. Mi tin
realmente duele pa loke a pasa.
Mi ke pidi diskulpa. Mi no a
aktivá mi arma.”
Te asina leu ku por a
komprondé durante tratamentu
pro forma di e kaso, e víktima
a haña dos bala. Un di e
proyektilnan a keda den su
kurpa, miéntras ku e otro a sali
bèk. Defensa ta hungando ku e
idea ku e dos balanan aki
tabata dispará pa dos arma
diferente. E bala ku a keda den
su kurpa lo ta di e Glock . Riba
esun otro tin duda. Fiskal
sinembargo a bisa ku e bala
ku a pasa den kurpa di e
víktima no tabata di un arma
polisial.
Di tur manera, e
abogadonan tabata deseá di
haña rapòrtnan balístiko mas
profundo di e balanan ku a
kousa morto di e agente polisial
Ferry Bakx. Un di e
abogadonan a bisa ku
sperando riba e rapòrt aki e lo
hasi despues mas pregunta,
pasobra awor en todo kaso no
tin klaridat riba e punto
importante aki.