Gerstenbluth: Stòp di fomentá pániko

WILLEMSTAD.-Dr. Izzy Gerstenbluth a duna klaridat riba e 3 kasonan di Covid ku tin aktivo na e momentunan aki. E epidemiólogo a splika ku e kasonan di kontagio lokal no tin niun lenk ku otro i hustamente esei ta pone ku mester ta mas kuidadoso pasobra por tin mas kaso den komunidat. Mester tene kuenta ku lo por bini mas kaso di transmishon lokal i ku e por plama lihé. Pa e motibu ei mester a tuma medida mesora, sinembargo no a tuma medida mes pisá manera Kòrsou a konosé anteriormente.

Pa loke ta trata e kaso na e banko lokal tin hopi diskushon i hendenan ku ta duna opinion sin ku esakinan ta basá riba realidat. Gerstenbluth a hasi un yamada drástiko na tur hende pa sigui solamente medionan di informashon ofisial pa haña notisia verídiko riba desaroyonan di Covid na Kòrsou. E kanalnan ofisial di gobièrnu no ta bai gaña ni skonde informashon pasobra no tin nodi di skonde ni gaña. El a enfatisá ku mester tene kabes friu. No bai tras di miedu i stòp di krea pániko. Gerstenbluth a sigui bisa ku el a tuma nota di hendenan ku ta haña ku e no ta aktuando korekto pasobra e hendenan ei ta haña ku e mester a sera skol pasobra tin mucha ku kaso positivo etc. E profeshonal médiko a bisa ku niun di e kosnan ei ta bèrdat. No tin kaso positivo di mucha ku ta bai skol. Hendenan mester sin distinguí kiko ta karentena i isolashon. Un hende den karentena no ta nifiká ku e ta positivo. Den karentena ta tèst e hende debí ku e por tabata den kontakto ku hende infektá. Ta sigui tèst i wak si e tin síntoma. Un hende positivo ta bai den isolashon. Ta di lamentá e forma ku ta plama informashon i asta nòmber di hende. Mester respetá otro, e kos aki no ta bon.

Di forma kategóriko Gerstenbluth a bisa ku e skol no mester hasi nada pasobra nada no a pasa na e skol. No tin motibu pa serka skol pasobra niun hende positivo no a bai skol. A kuminsá ku akshon pa limpia skol, masha bunita pero no ta nesesario. Stòp ku akshonnan di pániko. E ta pidi pa hasi e kosnan ku si mester hasi. Djis kòrda ta kon e vírus ta keda transmití, esta den airu kaminda aglomerashon di hende. Stòp di fomentá mas pániko. Awe djadumingu ta tèst e koleganan di e kaso aktivo. Mas detaye den edishon di EXTRA.