PARIS (AP).- Corona Vírus a krusa mas frontera i a logra otro rèkòrt ayera ora ku a registrá e di 100.000 persona infektá mundialmente, miéntras e ta afektando bida diario di miónes otro. Esnan ku mas ta sufri bou dje kondishonnan aki ta esnan sin protekshon i esnan ku malesa.
E vírus a mata mas ku 3.400 hende kaba, el a logra pasa fronteranan di Merka i por lo ménos kuater otro kontinente. Asta e ta yegando hopi serka dje murayanan di Vatikano. E vírus aki a fòrsa paisnan manera Iran pa tene moskénan sera i asta posponé seshonnan di orashon diario. Es mas, asta a disidí di posponé e tradishonal peregrinahe pa e sentro sagrado di Mekka. A blòkia tambe siudatnan manera Bethlehem ku ta e sitio sagrado di nasementu di Hesus, miéntras ku a disidí di hasi adaptashon den e plannan pa bai risibí i tene e parada di antorcha Olímpiko na Hapon.
Pa loke ta merkadonan finansiero, esakinan a baha atrobe komo reperkushon di presensia dje vírus den e ekonomianan real na mundu. “Ken ta bai alimentá nan famianan”, asina Elias al-Arja, hefe di un asosiashon di hotèlnan na Bethlehem a duna di konosé. Den e region aki na West-Bank ku ta okupá pa Israel, turistanan a ser prohibí, miéntras ku e iglesia a wòrdu será.
Na Kas Blanku, Presidente Donald Trump a firma un lei di $8.3 bion pa kombatí e vírus, un dia despues ku Italia a duna di konosé ku e lo bai dòbel e kantidat di fondo pa hiba e lucha, kalkulá tambe na $8.5 bion.
Pa loke ta e kantidat di kasonan di infekshon riba un base mundial, esakinan a yega 100.000, di kual e gran mayoria komo 80% ta na China, unda e malesa a start.
