KRALENDIJK – “Na e momentonan akí nos tin ainda hopi kaso di COVID-19 na Boneiru. Awe nos tin 107 kaso aktivo i tin 6 hende na hòspital pa motibu di COVID-19 i unu na Kòrsou awor.  E kantidat di kaso ta stabil pero muchu haltu”, gezaghebber Edison Rijna a bisa den konferensia di prensa ayera tardi.

E promé mandatario a bisa ku den e delaster simannan mayoria di hende a pega ku e vírus na skol, akohida pa mucha, na kas òf na trabou.

E delaster 7 simannan tabatin 13 grupo di kontagio, esta cluster na skol i na akohida pa mucha. Ta trata mucha ku ta mas yòn ku 12 aña.

Por lo general mucha no ta bira masha malu ora nan pega ku e vírùs. Nan por pega otro mucha òf adulto, òf e grandinan rònt di nan sí i esei a sosodé.

Rijna: “Danki na entre otro e kantidat di hende ful bakuná nos no tin nodi di tuma medida mas pisá na e momento akí. Den e grupo di persona di  18 aña bai ariba, 73,3 porshento ta ful bakuná. Den e grupo di  hóben entre 12 te 18 aña, 45,1 porshento ta ful bakuná.”

E porsentahenan akí no ta basta haltu ainda pa logra ku e vírus ta  stòp di plama, komo ku e variante  di dèlta ku nos tin awor,  ta masha kontagioso. E bakuna ta protehá hende pa nan no haña keho serio si nan pega ku e vírùs. Un persona ku no ta bakuná, tin 20 biaha mas chèns ku e mester bai hospital ora e pega ku e vírùs kompará ku un hende ful bakuná.

Rijna a indiká: “Boneiru a bira mientrastantu un pais di riesgo hopi haltu pa e islanan ruman. Pa e motibu aki por ehèmpel e gastunan pa tèst pa bai Kòrsou i bini bèk a subi, te bira mas karu ku e pasashi mes. Nos sa ku hopi hende ta biaha pa bishitá famia na Kòrsou por ehèmpel. P’esei mi ta  deliberando ku e otro islanan ruman pa wak si por adaptá e kondishonnan di biahe pa biahero ful bakuna for di Boneiru i asina baha nan gastunan di tèst.”