CARACAS (AFP).- Hustisia venezolano a imponé kondena di entre 21 pa 30 aña di prizòn pa akusadonan ku a forma parti di un grupo armá ku tabatin intenshon pa tumba gobièrnu di Nicolas Maduro den 2020.
E asina yamá “Operación Gedeón” tabata un grupo paramilitar, ku segun gobièrnu a keda desmantelá den mei di 2020 i ku tabata enkabesá pa militarnan retirá venezolano i mersenarionan estranhero, pagá pa oposishon, ku di su banda ta nenga e akusashonnan.
Di e 29 akusadonan, 20 a keda kondená na 30 aña di prizòn i nuebe na 21”, segun e fiskal general Tarik William Saab riba e ret sosial X, despues di un oudiensia den un tribunal kontra di terorismo.
“Di e manera aki nos ta kuminsá na sera un periodo skur”, segun e fiskal. “Un grupo di venezolano, den kordinashon ku aktornan i podernan ekstranhero, a forma parti dje operashon ku tabatin komo meta e asesinato di funshonarionan di nivel haltu, inkluyendo Maduro”.
E organisashon di Derechinan Humano i Demokrasia a publiká riba X e nòmbernan di esnan kondená pa terorismo, traishon na patria i tráfiko di arma di guera.
Kastigu máksimo a bai pa Josnars Adolfo Baduel, yu dje general Raúl Baduel, amigu bieu di Hugo Chávez kende a tuma distansia for di chavismo i a bai resultá den prizòn, kaminda el a muri den 2021.
Yu muhé dje militar, Andreina Baduel, a kalifiká komo “inhustu” e kondena kontra di su ruman i a denunsiá ku esaki tabata víktima di tortura. “E poder hudisial ta sekuestrá, pero mester kumpli ku reglanan pa por akudí na instansianan internashonal”, segun e ruman a deklará na AFP.
Segun e vershon ofisial, Gedeón tabatin komo meta pa invadí Venezuela via laman for di Colombia pa deroká Maduro. Ocho persona na e okashon ei a muri den enfrentamentu ku militarnan.
Dos norteamerikano kondená na 20 aña pa e kaso, Luke Denman i Airan Berry, a keda saká for di prizòn i entregá na nan pais den un interkambio di prezunan ku a kondusí na liberashon dje kolombiano Alex Saab, kontratista dje gobièrnu di Maduro.
