MIAMI.- Djamars a drenta e grato notisia ku un pelotero hóben yu di Kòrsou mas, a keda di draft pa un klup di Liga Grandi i den e kaso aki ta trata di Kay-Lan Nicasia kende a keda di draft pa Milwaukee Brewers den di 16 rònt. Kay-Lan ta yu di e èks pelotero den nos beisbòl Dòbel A Rubelyn Nicasia, pues alabes nietu di e legendario tékniko di beisbòl infantil di e organisashon di Marchena Shon Ki Nicasia. Kay-lan mes a kuminsá su karera di beisbòl den e organisashon di Jandorèt i despues ku na 2010 Shon Ki a fayesé, el a pasa pa e organisashon di Marchena. Despues di esei, el a pasa pa Merka kaminda el a kontinuá ku su estudio i tambe sigui desaroyá su mes den beisbòl. Kay-Lan tabata na Champagnat Catholic Highschool, kaminda ya e organisashon di Brewers tabatin bista riba dje. For di 2019 ora ku el a kuminsá na e skol, ya skout di e ekipo tabatin bista riba dje. E tabatin un tremendo kampaña e aña aki, na momentu ku el a bati pa averahe di .348 ku seis honron i 19 kareda empuhá huntu ku tres base robá. Pa Kay-Lan mes e tabatin 90% sigur ku e ta bai wòrdu di draft. “For di 2019 e skout a bisa mi ku mi tin abilidat pa por wòrdu di draft. Semper mi a haña leuk pa por bira un hungadó profeshonal. Na Kòrsou nan tabata bisa mi ku estatura lo bai stroba mi desaroyo pero semper mi a perseverá i nunka mi no a give up”, asina Kay-Lan a bisa Mundu Deportivo. Aworakí mes e ta na Merka reglando su dokumentonan, pa e por biaha pa Arizona. Pa Rubelyn mes, esaki ta un logro grandi. “Komo tata esaki ta nifiká hopi. Ta un deseo ku nos komo tata deportista / atleta tin for na momento ku nos yunan nase di ta eksitoso un dia. Pa ami tabata un privilegio di por ta’tin e responsabilidat aki ku Kay-lan pa por a gui’e mas tantu posibel pa logra su meta nan”, asina Rubelyn a indiká. Tambe el a agregá ku esaki ta un proseso di konsientisashon di kada mayor ku tin yu den organisashon di Marchena. Ku kada kos tin na momento. Fe i pasenshi no hansha , no ta den komparashon paso kada un di nos Dios ta kòrda riba nos na su debido tempu. Asina Rubelyn a finalisá bisando. Pabien an Kay-lan i éksito ku bo karera profeshonal!