WILLEMSTAD.- Mañan djasabra, 25 di ougùstùs entre 5 or di atardi i 11 or di anochi lo tuma lugá den kurason di Otrobanda ‘Kaya Kaya Street Party’.
Bishitantenan di e evento ku ta tuma lugá den Ferdinandstraat den Ser’i Otrobanda lo por disfrutá di un show kultural di kaya ku arte, músika ‘pop-up’ restorant, pakusnan i bendedónan ambulante i un grandioso ‘Latin Bodega’.
Inisiativa di e festival aki ta bini di Kurt Schoop, Raygen Zuiverloon i Clayton Lasten i a keda organisá pa Fundashon Ser’i Otrobanda. “E evento ta mas ku un fiesta so. E ta un manera pa laga e abitantenan bini huntu i pa duna e kaya un impulso positivo”, segun Kurt Schoop.

Fundashon Ser’i Otrobanda
Un grupo di abitantenan di Otrobanda a uni forsa i yuda pa e festival aki bira realidat. E intenshon tabata ta pa a hasi algu chikitu, pero segun e trabounan di preparashon ta tuma su kurso, nos a mira ku mas i mas abitante ta embolbí nan mes den e preparashonnan. A limpia e bario, a fèrf e kasnan i asina a bin mas i mas idea aserka.
"Den e parti kaminda e festival ta tuma lugá bo ta mira un kombinashon di kas nan den mal estado i un parti tambe bunita renobá. Aki bo ta mira diferente grupo di hende ta biba dushi huntu den e mes un bario, pa generashonnan”, Raygen Zuiverloon ta konta. Ku e evento aki e inisiadónan kier duna e bario un ‘boost’ i reforsá e laso aun mas entre abitantenan. Esaki ta basa riba “community building”.
Schoop: “Motibu e di e festival Kaya Kaya aki ta un soño ku e tin basta tempu kaba. Ku fundashon Otrabanda e ke realisá algu den e kaya aki.”
Djasabra awor lo wòrdu pinta 4 “mural” riba muraya dor di artistanan Pito Polo, Zico Alves, Viangelo Lomp i artistanan di ART Heals Foundation.
Tin 2 parti habri den e bario kaminda a limpia i buta greis. Despues di e festival abitantenan por sigui hasi uso di e plenchi aki, p.e. pa un aktividat sosial òf un BBQ den bario. Un tep pa e dia aki ta bin ku bo sneaker nan pa por baila riba e greis. Tin 4 área di músika ku 8 Dj lokal i e banda di Reggae, ‘Uprising’. Abitantenan lo pone nan kas disponibel komo galeria di arte, kuránan lo kambia den un restorant. E sintimentu di un komunidat ta biba ainda den Otrobanda i ku un vibrashon positivo nos ta invitá tur hende pa bini e aktividat aki.