WILLEMSTAD.- For di momentu ku e tim di ‘Kaya Kaya’ a anunsiá nan idea tabata bisto ku e evento aki lo a hala un bon públiko.
Loke a sorprendé e organisadónan mes ta e hecho ku un kantidat masha grandi di públiko a asistí na e evento. Tur lugá di parker a yena, pero esaki no a stroba niun hende. Nan a parker kaminda a logra di haña un pida lugá i a kana bai Ferdinandstraat pa bai disfrutá dje tremendo ambiente ‘Kaya Kaya Street Party’.
E kombinashon di músika ku dj, benta di arte tantu riba kaya komo eksposishon den diferente kas i aserka animashon musikal di ‘Hype’ i ‘Uprising Band’ i den e ‘bodega’ músika latino a zona!.
‘DEN E BEMBE’ a kombersá ku Kurt Schoop, miembro dje tim organisadó kende a indiká ku e evento a bai hopi bon mes i ku e kantidat di hende tabata kompletamente for di loke ku nan a spera. ‘Hopi great, tur hende ku bon humor. Ta den un par di siman nos a organisá e evento. E tim a traha ku tremendo konfiansa ku otro. E ayudo di abitantenan di bario a pone ku kosnan a kana zeta!. Henter e konsepto di ‘Kaya Kaya’ a den asina un ‘flow’, asina Kurt a indiká.
Pa loke ta trata e desishon riba un siguiente edishon, Kurt a bisa ku nan no a tuma desishon ainda. ‘Na promé lugá mester kubri e gastunan organisatorio i si sobra algu nos lo wak ki desishon lo tuma. Importante ta pa hasié un kaminda ku meresé un sosten i uni e abitantenan. Traha huntu krea kos i ser’e ku un bon fiesta. No ta sigur ku nos ta bin bek Ferdinandstraat, pero e por ta un otro kaya’, asina Kurt a terminá bisando.
Riba foto nos por apresiá algu dje ambiente di ‘Kaya Kaya Street Party’ durante di atardi.