NEW YORK.-  E yu di Kòrsou Keanu Irausquin ta bai ta den akshon otro siman den un pelea importante di arte marsial miksto (MMA). Esaki ora e ta parti di e programa di Cage Wars 67. Cage Wars ta un promoshon di MMA ku ta establesé na New York. E programa di Cage Wars 67 ta tuma lugá 13 di sèptèmber na Rivers Casino Schenectady na New York.

Irausquin lo bringa pa título durante e programa di Cage Wars. E lo enfrentá e merikano Chris Hidley pa e título di “bantamweight” (126-135 liber). Esaki no ta promé biaha ku Irausquin ta partisipá den Cage Wars, mirando ku den pasado el a partisipá den otro edishon.

E pelea entre e yu di Kòrsou i Hidley lo ta parti di e “maincard” di e anochi aki. Mirando ku ta un pelea amatùr, e lo ta di tres rònt di tres minüt. Gideon Jonker i David Hawker lo biaha ku Keanu, i lo fungi komo su entrenadónan. Ayera despues di a train huntu ku entre David Hawker, Deporte EXTRA a kombersá ku Keanu Irausquin. E hóben atleta ta hopi entusiasmá pa e oportunidat aki.

“Mi ke probechá e oportunidat aki pa pone tantu Kòrsou i mi mes riba mapa. Mi lo sali ku mi bandera di Kòrsou riba e anochi aki”, Irausquin a bisa.

Miéntras ku e leyenda di bòkseo Mike Tyson, lo ta den komentario durante Cage Wars 67.