MERKA.- E aktornan Ryan Reynolds, Dwayne Johnson ‘The Rock’ i Robert Downey Jr. tin e aña aki e salarionan mas haltu dje industria di sine danki na nan proyektonan nobo i mester destaká e impakto di e plataforma di ‘streaming’ Netflix den e ganashi dje aktornan.
Reynolds ta na kabes dje grupo ku 27 mion dòler, esaki pa ta e protagonista dje pelíkula di Netflix ‘Six Underground’, dirigí pa Michael Bay i ku ainda no tin un fecha di estreno.
Na di dos lugá riba e lista tin ‘The Rock’ i Downey Jr., kende kada un lo gana 20 mion dòler, e promé pa e di 9 edishon di ‘Fast & Furious’ ku lo ta riba pantaya ougùstùs 2019 i e di dos pa ‘The Voyage of Doctor Dolittle’, pendiente pa estrená den luna di yanüari 2020.
E siguiente aktor ta Will Smith, ku 17 mion dòler pa ‘Bad Boys for Life’, ku lo keda estrena yanüari 2020, ounke ku mester kalkulá ku e lo gana 35 mion doler di Netflix, esaki dado kaso e bolbe tuma su ròl komo polis den ‘Bright 2’.
Jason Statham, otro dje aktornan di ‘Fast & Furious’, lo no gana mesun kos ku ‘The Rock’, pero asina mes e ta den e Top 10 ku un salario di 13 mion dòler, un sifra den e rango di Tom Cruise ku lo kobra pa ‘Top Gun: Maverick’, entre 12 pa 14 mion dòler.
E salario ta igual na loke ta keda kalkulá pa e promé aktris riba e lista, Emily Blunt, ku lo ta e protagonista den e di dos edishon di ‘A Quiet Place’ ku lo keda estrená den luna di mei 2020, pa mas o ménos 12 pa 13 mion dòler, praktikamente e mitar di loke e aktornan mihó paga ta kobra.
Brad Pitt i Leonardo DiCaprio, e protagonistanan di e pelíkula nobo di Quentin Tarantino, ‘Once Upon a Time in Hollywood’, lo optené un chek na balor di 10 mion dòler kada un, den loke ta prometé di bira un dje pelíkulanan takiyero di verano, i lo ta meskos ku e aktris Gal Gadot lo kobra pa ‘Wonder Woman 1984’, ku lo estrená den yüni 2020.
E últimonan ku ta riba e lista ta Idris Elba (Fast & Furious) i Ben Affleck (Triple Frontier) ku 8 mion; Kristen Stewart ("Charlie's Angels"), 7 mion; Martin Lawrence ("Bad Boys for Life"), 6 mion; Joaquin Phoenix ("Joker"), 4,5 mion i Jessica Chastain ("It: Chapter 2") ku 2,5 mion dòler.