MIAMI.- Kenley Jansen tabata konvensí ku lo e keda nombrá den e All-Star team di Liga Nashonal. El a studia e situashon. E ‘closer’ di Dodgers tabata konvensí ku su sifranan i impakto den un dje mihó ekiponan di momento den MLB ta demasiado impreshonante pa no tene kuenta ku su persona.

Pero e roster di All-Star di MLB a keda anunsiá djadumingu i no a inkluí e pitcher yu di Korsou. E úniko kos ku e por a hasi ta di hari.

“Hari di desapunto”, Jansen a bisa ayera nochi den Marlins Park. “E ta un insulto. Kisas mi mester tin un ERA di sero i sero ‘blown saves’, probablemente, pa mi por haña rekonosimentu”.

Jansen no tin nada di eseinan, pero e tres biaha All-Star no ta leu. E pitcher di 33 aña ayera tabata pará ku 21 salbá den 23 oportunidat i 1.30 earned-run averange den 34.2 inning di trabou. E no a tuma kareda den 13 aparishon for di 28 di mei. E ta mustra di ta e pitcher dominante di pre-2018, mirando bek riba e tempu ku e tabata konsiderá komo e miho relevista den Major League.

Por sierto ku ayera Kenley Jansen a drenta wega den di ocho. El a tuma 1 hit i a duna un base por bola i ta sera e inning ku un kareda di Marlins, pero ku no a bai riba su nòmber. Den di nuebe Uceta ta subi montikulo pa Dodgers i nan ta dal e hit i homerun, ku kua Dodgers a pèrdè e wega.

Demas pelotero:

Andrelton Simmons di 4-1, Ozzie Albies 3-1 ku un kareda anotá. Jonathan Schoop ku un hit den sinku turno i e arubano Xander Bogaerts di 4-3, un kareda anotá i a empuhá su di 49 kareda.

De Minor League: Kevin Josephina di 5-3, un kareda, dos strike out i e ta ligando pa .304. Ray Michel di 4-1 ku dos strike-out. Junior Martina a bati su di dos homerun di temporada, el a liga di 4-2 ku 2 RBI, 1 strike-out i un pasashi grátis. Cedanne Rafela di 4-1 ku un strike out.

Den Independent League: Darren Seferina di 3-1, un anotá i a empuhá su di 14 kareda. Curt Smith sin hit den 4 turno, ku dos ponche.