LOS ANGELES.- “Lo mi ke lubidá e wega aki mas lihé posibel”, esei tabata palabranan di Kenley Jansen despues ku LA Dodgers a pèrdè e di dos partido den e World Series 2017.  LA Dodgers tabata ganá 3 pa 1 pero no por a sera e di nuebe inning i a mira kon Houston Astros a empatá e partido pa finalmente gana ku skor di 7 pa 6  den un berdadero drama ku a bira un partido rèkòrt pa Major league Baseball pa loke ta homerun konektá den un partido. Ocho homerun di kual 5 den extra inning ta e rèkòrt pa MLB.

“Mi ta humano i kos por pasa ku mi tambe, ta djis lubidá e partido aki i prepará pa wega number 3. “Nos tin picher ku por tira miéntras Houston su mihó pichernan a tira kaba”, asina Kenley Jansen a deklará.

Importante ta awor aki pa nos gana sea kaba kos na Houston òf bin kaba kos na kas, Kenley Jansen a bisa. E picher yu di Kòrsou a gradisí e fanátikonan ku a keda duna sosten na e ekipo Dodgers te último out i esei a duna nos hopi forsa pa nos a sigui lucha i bin bek kada biaha pa empatá e partido.

“Kisas hopi ta pensa ku mi no tabata kla ora ma drenta den di ocho inning, pero mi tabata kla,  bon kalentá i mi no tabatin problema pa subi den di ocho inning. “Pero e kosnan no tabata na mi banda i mi no por a sera e porta e biaha aki pa mi ekipo. “Ta kosnan ku por pasa... ta di lubidá e wega aki i ban Houston pa sigui den e lucha aki. Ta e dos mihó ekiponan di Liga Grandi ta hungando den World Series pues nos mester respetá otro i esun ku faya ta haña mesora. Bo no por pifia den e serinan aki. Awor aki nos ta empatá 1 pa 1 ke men seri largu ainda ta di konsentrá riba loke ta bin i lubidá loke a pasa.

Mas aleu Kenley a bisa ku nan tin un bon ekipo. “Nos tin picheo, bullpen i bateo,  pues nos no mester preokupá sino djis sigui hasi nos trabou”, asina Kenley Jansen a terminá bisando.

Partido number 3 ta awe nochi den Minute Maid Ballpark i ta pendiente pa un tremendo partido. No mester lubidá ku Houston Astros ta krese enormemente hungando na kas.