LOS ANGELES.- E ‘closer’ yu di Kòrsou, Kenley Jansen, ofisialmente a bira agente liber ayera. Ayera e sindikato di hungadónan di Liga Grandi MLBPA, a anunsiá e 137 hungadónan ku a bira ofisialmente agente liber. Ainda por tin mas hungadó ku por bira agente liber durante ‘offseason’. Jansen ya den final di temporada 2025, a indiká ku e no ta kla pa retirá i ta buskando pa sigui kompetí den su di 17 temporada otro aña. Den entrevista fin di sèptèmber, Kenley a indiká ku e ta deseá di picha alrededor di kuater aña mas. E aña aki el a sa di gana dies mion dòler den su akuerdo di un aña ku Los Angeles Angels.

Den 62 aparishon e temporada ku a pasa, el a picha 59 ‘inning’ i a kaba ku un ERA impreshonante di 2.59 i a konbertí 29 wega salbá den 30 oportunidat, huntu ku un rèkert di 5-4 ku 57 ponche i solamente 19 base por bola. Aktualmente e tin na tur 476 wega salbá, bon pa di kuater puesto riba lista di tur tempu di Liga Grandi. E falta dos wega salbá mas pa alkansá Lee Smith na di tres puesto, kende tin 478 wega salbá den su karera. Tantu Mariano Rivera ku tin e rèkert di 652 wega salbá, komo Trevor Hoffman ku tin 601 i Smith, ya ta den Salon di Fama. Pues, Kenley, si tur kos kana manera mester ta, lo pasa Lee Smith pa e di tres puesto i sin duda ta pone su mes den hopi bon posishon pa garantisá su posibel instalashon den Salon di Fama den futuro. E echo ku e ke sigui kuater aña mas, ta bira interesante kuantu e por kaba kuné na final di su ya kaba ilustre karera. Tin algun ekipo ku sigur lo bai ta interesá den servisionan di Kenley Jansen, espesialmente teniendo na kuenta ku e temporada ku e tabatin e aña akí.