WILLEMSTAD.-  Spesialmente pa Dia di Mama Kenneth Doran a komponé, Borrel Dopwell a produsí i e hóbennan Shentily Zimmerman, T-Kayley Polonius i Naemy Kirindongo a interpretá e kansion ‘E Ser ku tin mi na Bida’.

‘DEN E BEMBE’ a kombersá ku Kenneth Doran kende a splika ku kolega Kenneth Hooi a aserk’é pa komponé un kansion pa Dia di Mama pa tres hóben ku hopi talento.

‘Keriendo den nos hóbennan mi a tuma e reto i a komponé e kansion ku ta relatá kuantu amor e hóbennan aki tin pa nan mayornan. E letra ta toka kurason di tur Ser ku ta Mama. Ku e areglo maestral di Borrel Dopwell e kansion aki a bira un hoya di piesa. Un danki na Dios pa e bunita inspirashon pa tres hóben ku hopi talento. Dios kuida i protehé nan i nos tur’, asina Kenneth a terminá splikando.