WILLEMSTAD.- E Akademia di Músika “Maestro Errol ‘El Toro’ Colina” ketu bai ta konfrontando problemanan finansiero.
Djabièrnè último ‘Junior All Star Orchestra’ a kaba di kompaña 12 kantante durante di un festival di kanto ku a tuma lugá na Boca Sami i a risibí masha komentario positivo di públiko i músikonan ku a presensia e evento.
E proyekto ku ta eksistí pa 12 aña kaba riba un base anual ta eduká alrededor di 700 hóben musikalmente, den un forma efisiente i ku bon resultado. Un i tur por rekonosé ku e akademia ta prepará e hóbennan bon i muestra di esaki ta ku diferente dje hóbennan aki a pasa pa forma parti di agrupashonnan musikal lokal, kor di misa i gruponan di entertainment.
E hóbennan, den nan mayoria entre 12 pa 18 aña, a presentá den un forma espektakular ku e banda G-Spot durante Festival di Tumba 2017, nan a presentá tambe durante di Festival ‘Un Kanto pa Kòrsou’, Dia di Bandera i asina por sigui menshoná.
Na inisio dje aña aki Instituto pa Formashon Musikal a risibí e grato notisia ku dos dje hóbennan di e Akademia Musikal a logra di gradua ku hopi bon resultado via di e sistema ‘on line’ di e konservatorio renombrá Berklee.
‘DEN E BEMBE’ a komprondé ku e promé mitar di aña ‘Criminaliteits Fonds’ a duna su aporte pa lèsnan por a keda duna, pero aworakí e organisashon ta konfrontando problema finansiero pa por kumpli ku e proyekto i su debernan fiskal.
‘DEN E BEMBE’ a buska kontakto ku Sr. Manfred ‘Feko’ Gomes, presidente di Instituto pa Formashon Musikal, pa wak si el a aserká Minister di Kultura i Edukashon riba e posibilidatnan pa por logra yega na un solushon riba e situashon aki, pero nos no a logra.
Nos boka ta yen ku mester yuda hóbennan pa nan no kue kaminda robes, anto e proyekto aki sigur ta un di esnan ku no por stòp di eksistí, el a demostrá ku e ta di gran balor i ta duna aporte na desaroyo musikal di nos hóbennan.
‘DEN E BEMBE’ ta hasi un apelashon na komersio, gobièrnu i instansianan no gubernamental pa ban yuda e proyekto aki.