WILLEMSTAD.- Elke Uitenhuis ta bai start ku su periodo di residensia, komo e 'Artist In Residence' den e programa di Mondriaan Fonds, ku un evaluashon interesante di e ròl di arte den aktivismo. Huntu ku e artista, e studiantenan di IBB i miembronan di públiko ku partisipá lo tira un bista riba e artista su práktika artístiko i aktivista. Tambe nan lo diskutí tokante diferente proyekto di arte di artistanan manera Jonas Staal, Patricia Kaersenhout, Matthijs de Bruijne, the Yes Men, John Jordan, i mas. E eksplorashon di práktikanan eksistente aki lo sirbi komo un komienso pa un diskushon tokante di e relashon entre arte i aktivismo. Preguntanan lo bin dilanti, manera: Arte i aktivismo ta kana man den man? Ki tipo di strategia artístiko ta wòrdu usá aktualmente pa sirbi ki tipo di meta polítiko? I kon efektivo e intervenshonnan artístiko i polítiko aki ta?
Despues di diskutí e bienestar di e matrimonio entre arte i aktivismo nos lo eksplorá te ku kua grado studiantenan ta konfrontá ku inhustisia sosial i polítiko den nan bida diario. Nos lo diskutí si nan ta sinti e urgensia pa hasi algu tokante e inhustisia ku ta rondoná nan, i si t'asina, kiko nan ta pensa ku nan por hasi tokante di esei, i kon nan lo usa nan abilidatnan artístiko di moda ku nan por hasi un kambio den bida real.
Basá riba e introdukshon profundo aki studiantenan lo tin ku skibi un "pitch" den kua nan ta argumentá ki tipo di problema polítiko òf sosial mester keda adresá pa medio di un intervenshon artístiko i o aktivista i dikon. Tur studiante mester presentá nan "pitch" i despues kolektivamente nos lo selektá te ku 3 tema pa traha riba dje.
Den grupo nos lo 1) investigá e temanan skohé, 2) pensa intervenshonnan artístiko ku lo por konfrontá e òf hasi e inhustisia (polítiko) visibel, i 3) traha riba un proposishon koherente pa un intervenshon artístiko/aktivista.
Durante di e proseso di traha rumbo pa un proposishon, studiantenan lo presentá e ideanan i e desaroyo na otro riba diferente okashon dor di mustra otro imágennan i dor di splika e pasonan ku a keda tumá den e proseso di pensamentu.
Bo kièr partisipá? Manda un e-mail pa omar@institutobuenabista.com pa mas informashon. Partisipashon ta grátis, pero un donashon pa e instituto semper ta bon biní.