WILLEMSTAD.- Den e siman di inskripshon di Tumba ta importante pa kompartí e artíkulo interesante aki. Un splikashon fásil pa komprondé di kiko ta un komposishon i tambe kon e sistema pa skohe e tumba ganadó pa Festival di Tumba.
Un komposishon ta un obra musikal nobo; esta un kreashon no eksistente. Komponé ta nifiká konsipiá algu nobo. Den e kaso aki kombiná elementonan musikal den un struktura nobo. Si e  obra musikal aki tin un melodia nobo, sin letra, e ta un komposishon instrumental.  Un komposishon ta un  obra musikal ku letra i melodia nobo.
E intérprete  e ora ei ta kanta e teksto konforme e melodia korespondiente.

Un komposishon ta konsistí di dos (2) parti:
Kompositor di melodia i outor di  e letra. Si ta mesun persona krea tantu e melodia komo e letra, é ta e kompositor.
Esun ku krea e teksto (e letranan) ta outor di letra. I no kompositor.
Internashonalmente e melodia ta 60% di e komposishon i letra ta 40% di e komposishon. Aki na Kòrsou nos ta mantené  e repartishon 50-50.
Den kaso ku un persona entregá un  teksto sin melodia  na un areglista, ku ta rekerí basta kambio(40 pa 50%) na e teksto,  i mester agregá mas frase òf teksto na e obra, e areglista ta bira kompositor di melodia i ko- outor di letra.
Den e kaso aki e areglista tin derechi di 75 % di e obra musikal.
Ta konsiderá un obra musikal komo plagia, ora ku e ku tin liña melódiko di vários kompas (8) di un otro obra musikal.
Ken ta un kompositor? Kompositor ta e kreadó di letra i melodia di un obra musikal.  Esun ku krea e letra so ta outor di letra.
Esun ku krea melodia so, ta kompositor di melodia.
Un komposishon ta konsistí di diferente parti importante. E aspektonan mas importante ta Letra i Melodia. Pero e parti di entonashon i areglo tambe ta parti integral di e totalidat. Den farándula Internashonal, durante e último 35 añanan, tambe nan a inkorporá e parti di entonashon den e aspektonan ku un kuerpo di hurado mester tene kuenta kuné ora mester definí un komposishon ganadó.
Den nos festival di Tumba e aspektonan ku ta importante ta: 1. Letra i Melodia (ku tin e peso mas grandi) 2. Ritmo i Areglo i 3. Ambiente den kaya.
Entonashon ta forma parti di e sekshon mas importante ku ta Letra i Melodia. Ta bon menshoná tambe ku asta músikonan partisipante, tin biaha ta interpretá uso di e reglanan inkorekto.
Tur aña di nobo mester splika ku kualkier un dje aspektonan aki por influensiá e puntuashon final i konsekuentemente, e Tumba ganadó. Hopi biaha nos ta pensa ku si un hende gana den letra, ta é mester tin e tumba ganadó. Si nos rasoná di e manera aki, nos ta eliminá e ora ei tur e aspektonan manera melodia, entonashon, ritmo i areglo.
O sea, si tin un letra masha bunita ku por sali ganadó, den kualkier kompetensia di poesia, no nesesariamente e mester gana den un kompetensia di músika/kanto, kaminda ta importante pa e letranan bon aki, ta sostené pa bon melodia, bon areglo i bon entonashon.
Ta p’esei a introdusí Premio Mihó Letra. Pa asina duna balor i importansia na e letra, ku no nesesariamente mester ta e tumba ganadó.