WILLEMSTAD.- Djabièrnè último Kiwanis Club Curaçao huntu ku Totolika a bolbe organisá un eksitoso fiesta pa tur e klientenan di e organisashon aki. Ya pa mas ku 25 aña Kiwanis Curaçao ta un di e sostenedó mas grandi di e fiesta aki ku ta karga number di Karnavalika.
Tur aña ta un plaser pa mira ku ki smak e hóbennan ta dibertí nan mes i pa Kiwanis Club Curaçao e satisfakshon mas grandi ta pa wak e sonrisa di alegria riba nan kara.
E aña aki tantu Rei di Tumba Hubenil, Sontje, Rei di Tumba di hende grandi, Dibo Doran, Reina di Karnaval i  Ray Lauffer tabata presente pa duna e hóbennan un atardi/anochi plasentero.
Nos Minister di Kultura Marilyn Alcalá-Wallé, tambe tabata tei i ku smak tabata baila ku e hóbennan. Di parti di Kiwanis Club Curaçao i Key Club diferente miembro a hasi akto di presensia i tabata un plaser pa pasa un momentu agradabel ku tur e hóbennan aki.
Un miembro di Kiwanis, a bini ku su ayudantenan i huntu nan a “smink” diferente hóben i a duna nan un toke karnavalesko.
Miembronan di Kiwanis Club Curaçao tabata hurado i na final di e anochi a premia e partisipante mas leuk disfrasá.
Tabata un atardi hopi agradabel i Kiwanis Club Curaçao ta gradisí un i tur ku a kooperá pa trese alegria den kurason di nos muchanan. Nan por sigui konta ku sosten di Kiwanis Club Curaçao. E potrètnan ta papia pa nan mes.