WILLEMSTAD.- Fundashon J.A.G. i KJ – 74 Foundation a uni pa huntu duna gruponan ku ta partisipá na Marcha Hubenil 2019 un tremendo regalo.
Fundashon J.A.G. a yama un reunion pa tur lider di gruponan hubenil ta presente pa asina risibí un bunita gesto for di man di direktiva di KJ – 74 ku pa Marcha Hubenil 2019 tres grupo lo por bin na remarke pa toka grátis den e dos marchanan hubenil.
Durante di e reunion e lidernan ku tabata presente a keda sumamente kontentu ku e notisia aki i djaweps dia 15 novèmber próksimo durante di e rueda di prensa di Fundashon J.A.G. lo bai skohe den e 7 gruponan aki esnan ku lo bini na remarke pa e dos toká nan grátis di ICONS by GIO.
Tantu Gilbert “Gibi” Doran komo Verney Jansen a ekspresá nan satisfakshon pa duna un man na Karnaval Hubenil kaminda ku nan tur dos tin nos muchanan na pechu.
Djaweps awor den e 7 gruponan ku tabata presente i ku ainda no tin un banda musikal òf un Dj pa marchanan lo saka tres ganadó. E promé lo bai ku e banda ICONS by GIO i e dos otro gruponan lo bai ku un “repeater”.
Hubert “Juni” Aniceta a gradisí direktiva kompleto di ICONS by GIO pa nan gesto i spera ku den futuro lo tin mas banda musikal ku lo por yuda nos gruponan hubenil pa asina por baha nan gastunan. Riba e foto por apresiá Verney Jansen, Gibi Doran i Juni Aniceta dunando splikashon na e lidernan di Grupo Hubenil ku a presentá na e reunion.