WILLEMSTAD.- Djasabra anochi a tuma lugá e apertura di Carnival Village ku presentashon di Orkesta Vega, Gentz, Icons by Gio i Kassav.
Un tremendo apertura kaminda públiko a respondé bon i kumpra nan karchi pa bai disfrutá dje presentashon di nos bandanan lokal i naturalmente e ‘highlight’ dje anochi Kassav.
Pa loke ta trata nos bandanan lokal, kada un di nan forma a entretené e públiko pero mester rekonosé ku Gentz tabatin e mihó presentashon di e anochi. Nan repertorio tabata bon hinka den otro i for di ora ku nan a subi tarima nan a kapta e atenshon dje públiko i a pone ambiente te final di nan presentashon.
Durante dje parti ofisial, Fundashon JAG a duna un rekonosimentu i hasi entrega di un rekuerdo na Mocky Job i Percy Pinedo, ámbos a duna nan kolaborashon pa por a realisá e presentashon di Kassav na Kòrsou. Riba foto nos por apresiá e presentashon di nos bandanan lokal i e momentu di rekonosementu di Mocky i Percy.