WILLEMSTAD.- Temporada 2016 di Blue Bay Curaçao Baseball Week ta tras di lomba. Ayera for di den oranan trempan di atardi te ku klousura den kareda di 12’or di anochi, tabatin un dushi ambiente di deporte den Tio Daou ballpark.

Manera ya ta e kustumber, e aktividat ‘meet and greet players’ ku a tuma parti na e siman di beisbòl tabata algu tremendo. Hopi ta esnan ku a probechá pa saka potrèt i tuma firma dje diferente streanan di beisbòl profeshonal ku ta na Kòrsou aktualmente.

Un biaha mas e organisashon a sòru pa un tremendo organisashon. E públiko a gosa i pa e peloteronan tabata algu ‘great’ di por a sinti kon pueblo di Kòrsou ta biba ku nan.

Normalmente ora ku e peloteronan ta riba vèlt sea na Rep. Dominicana, Merka, Ulanda òf kualke otro parti di mundu, nan lo ta imaginá ku na Kòrsou nos ta sigui nan. Pero ta na momento di un anochi manera esun di ayera, nan ta sinti e kalor dje pueblo di Kòrsou ku semper ta atento pa nan prestashon.

Manera ta konosí, esaki ta e delaster Curaçao Baseball Week di e manera ku esaki a bin ta tuma lugá kada aña. Ta e intenshon pa traha riba algu otro, pues un kambio pero semper ku e chèns pa trese e peloteronan profeshonal hopi serka dje públiko.