WILLEMSTAD.- Ya pa dos luna kaba e kantante lokal Melania van der Veen a bin ta traha riba e selebrashon di su 40 aña den farándula ku tei tuma lugá  dia 4 di novèmber na Klup di Shell.
Den un kombersashon ku ‘DEN E BEMBE’ a sostené ku Melania, el a konta nos ku e ta hinkando tur su energia pa e selebrashon aki ta unu inolvidabel pa e ku su fanátikonan.
Melania a sigui konta ku e mes ta trahando pa asina tur kos por sali manera e ta soña.
E anochi aki tei bira un anochi estilo Hollywood Theatre, pues bo mes por imaginá bu ku for di bo yegada kaba bo ta ser risibí na un manera spesial riba tapeit kòrá i e entrada di Klup di Shell lo ta kompletamente transformá.
E anochi aki, aparte di tur e sorpresanan ku ta bai tin, Melania a warda e tres gran premionan ku ta e biahe pa Panamá ku tur kos pagá, e pasashi pa e destinashon di bo soño ku American Airlines i e pasashi pa Hulanda pa e saka huntu ku algun premio mas.
Dia 2 di novèmber ku ta dia di Melania su kumpleaño, Melania lo bolbe saka algun premio pa esnan ku a kumpra nan karchi delantá, entre nan un wasmashin i un stof. Asina e ta selebrá ku su fanátikonan.
Melania lo kanta ku tur e tres agrupashonnan musikal e anochi aki, pues ku Classic XD, Hopi Forsa i tambe SO.
Karchi ta optenibel na Mister & Miss Exclusive, Bon Biní Supermarket, serka Shaka na Rapmhis Barbershop dilanti di Brantwer na Rio Canario, Licores Maduro i tambe na Shermeenas Beauty.