WILLEMSTAD.- Servisio Meteorologiko no ta antisipá formashon di nubia signifikante durante transkurso di awenochi. Di awe mardugá pa djamars, por spera mas nubia i ku un oumentu di chèns pa algun áwaseru. Bientu di otro un banda lo baha gradualmente durante djamars anochi i laman lo bira mas trankil ora Tormenta Tropikal Bret aserka nos region.

Awe ainda por lo general laman lo ta moderá ku altura di olanan entre 1 i 2 meter (3 pa 7 pia). E olanan di mas haltu ta den e zona na nort i e pasashinan entre e islanan. Djamars anochi gradualmente laman lo bira ménos brutu.

*Siklon Tropikal Potensial Dos* a bira Tormenta Tropikal Bret.  E sistema aki lo afektá nos tempu durante di transkurso di djamars anochi pa djarason. A emití atvertensia pa tormenta tropikal pa nos isla. E sistema aki por influensiá wer den nos region durante di djamars anochi pa djarason
Ta rekomendá públiko en general pa sigui nos boletin nan di tempu aktualisá relashoná ku e sistema aki.

Un otro disturbio aktivo riba parti nortwèst di Área di Karibe tambe tin hopi bon chèns di bira un siklon tropikal denter di próksimo dos dia. E sistema aki no ta di importansia pa nos isla.