WILLEMSTAD.- E ekipo kolegial di Sithoc for di ayera nochi a prepará maleta pa nan regreso den promé divishon di FFK Liga MCB. Sithoc ayera nochi logra un viktoria kontundente di 3-0 riba New Song i ademas di titulá kampion di 2da divishon, di forma outomátiko ta promové pa e kategoria prinsipal di futbòl nashonal. Sithoc ta logra esei despues di a pasa sinku aña den e di dos divishon.

Sithoc v/s New Song den e final a parse di lo a bira un wega hopi fuerte, konsiderando e dos empatenan durante di kampionato i un viktoria di 3-0 na fabor di New Song. Ayera tabata otro kansion i for di den e minütnan inisial por a tuma nota ku Sithoc tabatin dominio i ku fasilidat tabata drenta den e defensa di New Song. Tabata na di 27 minüt ku David Heyder ta habri e skor i den mesun promé tempu Phaibian da Costa Gomez ta pone e skor na 2-0. Den di dos tempu e wega a bira mas bistoso, ku New Song buskando pa kòrta e desbentaha. Sinembargo, gol number tres ta presentá pa Sithoc ora ku Michel Ulloque ku kabes bòl.

No opstante e skor, New Song a sigui bringa e wega i ala bes bringa kontra di oloshi. Despues dje pitaso final esnan di Sithoc a drenta den un tremendo selebrashon i for di ayera avisando ku Sithoc ta subi ku intenshon pa yega penetrá te den buèlta final.