KRALENDIJK -- Komo miembro di Konseho Insular, Daisy Coffie di Frakshon Coffie, ta sumamente desapuntá ku Kolegio Ehekutivo no ta logra kumpli ku algun di su obligashonnan legal ku e tin pa ku Konseho Insular. Esaki ta debilitá funshonamentu di Konseho Insular, ta baha e nivel di kontenido di funshoná, ta stroba e tarea di tene supervishon i kontrolá Kolegio Ehekutivo den ehekushon di maneho i kuné e ta stroba supervishon i kòntròl di e uso legal i efektivo di tantu fondonan komo biennan di e komunidat.

Coffie relashoná ku e tópiko aki, a manda un karta pa Kolegio Ehekutivo, pa atenshon di e forma kon ta trata Konseho Insular den su totalidat.

Obligashon

Fundamental den esaki ta ku Kolegio Ehekutivo tin e obligashon di informá Konseho Insular tur loke e konseho ta deseá, ku eksepshon di informashonnan ku ta konfidensial òf ta peligrá seguridat di nos komunidat. Esaki ta ankrá den WOLBES, Coffie ta skirbi.

Artíkulo 159 te ku 164 WOLBES, segun Coffie, ta duna Konseho Insular e outorisashon i kompetensia pa hasi pregunta, hasi interpelashon i hasi investigashon riba gobernashon.

Artíkulo 171 ta preskribí ku Kolegio Ehekutivo mester duna Konseho Insular tur informashon rekerí i responsabilisá nan maneho i to­ma di desishonnan.

Artíkulo 172 ta regla e supervishon di gezaghèber pa garantisá kumplimentu di prinsipionan di bon gobernashon.

Artíkulo 182 ta regla e responsabilisashon di gezaghèber na Kon­seho Insular di e maneho i desishonnan ku e ta tuma.

Artíkulo 183 te ku 186 ta regla e fluho di informashon ku Kontro­la­ria General mester duna Konseho Insular.

Garantia

Si ta kumpli ku e lei i reglanan aki, e ta duna Konseho Insular, pero mas tantu nos komunidat, e garantia i trankilidat ku ta hiba un gobernashon na nivel, ku vishon i ku e proseso demokrátiko di ‘check and balance’ ta funshoná, esta Kolegio Ehekutivo ta ehekutá i Konseho Insular ta supervisá, kontrolá i kaminda ta nesesario korigí, segun Coffie.

Coffie: “Lamentablemente mi mester konstatá ku esaki strukturalmente no ta e kaso. Preguntanan no ta keda kontestá òf ta kontestá mitar ku e konsekuensia ku un òf otro tópiko nunka por keda finalisá na un manera efikas i efektivo. Nan ta keda kologá.”

Coffie ta sigui skirbi, igualmente ta e kaso ku risibimentu di informashon òf dokumentonan riba un òf otro tema. Kuantu biaha ta sosodé ku mester posponé tratamentu di un tema sea den reu­nion di komishon fiho, den reunion di forma opinion i tin bes asta den reunion di toma di desishon, pasobra simplemente Konseho Insular no ta disponé di tur informashon nesesario pa yega na un desishon  balansá i responsabel.

Frustrante

Coffie ta haña e situashon aki frustrante, iritante i ta pone komunidat pèrdè tur konfiansa den su gobernashon. Konfiansa ta algu sumamente importante pa krea komprenshon i sosten den komunidat pa e maneho ku Kolegio Ehekutivo ta hiba.

Ya pa basta tempu mester konstatá ku spesialmente koalishon, pa mantené e asina yamá stabilidat gubernamental, ta bai di akuer­do numa ku maneho defisiente, maneho mankaron ku opser­vashonnan manera ‘mi ta bai di akuerdo sí, pero......’. Klaramente un aktitut di laga bai numa pa no krea konflikto polítiko, Coffie ta trese dilanti.

Neglishá

Coffie ta sigui skirbi, e situashon aki no ta sano i meresé tur atenshon di Kolegio Ehekutivo inkluso gezaghèber. E aktitut aki ta krea e impre­shon ku Kolegio Ehekutivo ta neglishá su tareanan i ku e peliger ta ku en bes di e desaroyo bai den e direkshon ku mas i mas ta prepará pa tuma tareanan over basá riba prinsi­pio di supsidiaridat i desentralisashon, ta tuma nota di un tendensia di sentralisashon di tareanan. No ta esei tabata e intenshon ora a skohe e status aktual di e relashon estatal ku Hulanda.

Coffie ta spera ku e karta aki ta un ‘wake-up call’ i ku den e tem­pu­nan benidero lo hasi tur esfuerso pa trese mehorashon den esaki na bienestar di funshonamentu di bon gobernashon.