WILLEMSTAD.- Ku hopi alegria i orguyo Kolegio Pierre Lauffer a risibí notisia ku su alumno, Samantha Guzmán Arango, a gana elekshon di Miss Curaçao Teenager djadumingu último.

Samantha ta un mucha muhé bunita pero no solamente pafó. Su beyesa eksterior ta refleho di su virtutnan ku el a usa pa prepará pa e reto akí ora di kompetí ku otro damsita mes bunita i ku mes gana di triunfá.

Samantha ta tuma tur kos na serio: meskos ku e ta tuma su estudio na serio, tambe el a tuma e kompetensia na serio. Spesialmente durante e último temporada por a mira kon e tabata hasi su máksimo esfuerso pa konsiliá sertámen ku skol. I el a logra tur dos. Na promé lugá danki na su perseveransia pero tambe danki na apoyo di su mayor i su dosentenan.

Personal, dosente i no dosente  ta super orguyoso ku e representante di nos hóbennan positivo di Kòrsou ta alumno di Kolegio Pierre Lauffer. Samantha, pabien i hopi éksito den bida!