Un felis djabièrnè...

Awe te dia pa e gran final di Festival di Tumba 2020...

Espektativanan ta haltu i bandanan ayera nochi a repasá nan tumba i segun informashon ku nos a risibí no ta masha kambio a sosodé...

Esnan ku a logra di via ‘Wild Card’ klasifiká pa awe nochi ta: 1 Tico Libiee; 2 Stanley Clementina; 3 Jurella Nita; 4 Thalysa Jano; 5 Jimmy The Kid i 6 Danny Yanga...

Ayera nochi nos a mira Danny Yanga sintá den e públiko ku a bai Festival Center pa presensia e evento di ‘Wild Card’...

Nos ta kalkulá ku mas o ménos 50 pa 75 persona a bai Festival Center i a sinta trankil den Red Carpet pa wak e video dje 10 finalistanan di ‘Wild Card’...

Ta manera un kolega den medio di komunikashon a bisa ayera tardi, e evento a keda manera un ‘movie night’...

Awe nochi tur partisipante ta start na 0000, pues awe ta dia di hasi bo kos pa bo por logra skor haltu...

Esnan ku a logra klasifiká via di ‘wild card’, mi tambe ta duda ku nan lo por tin un kambio asina grandi ku nan lo por surpasá nan puntuashon i tal forma ku nan lo por klasifiká riba e grupo ku a skor mas haltu riba e dianan preliminar...

Letra ta un parti importante di bo puntuashon i si esaki tabata suak riba e dianan preliminar mi ta duda ku sin niun kambio di letra lo bo por bòltu e mesun hurado su husgamentu...

E kambio di posishon lo por sosodé solamente si e presentashon di e tumba keda ehekutá ala perfekshon i ku pa ambiente den kaya,  melodia/ entonashon i ritmo ku areglo bin kambio den puntuashon...

Esei ta ‘Louie Louie’ su pensamentu, no nesesariamente bo mester ta di akuerdo ku mi...

Awe nochi tin yen faborito di públiko, pero loke tur biaha ta bin dilanti ta e presentashon riba e anochi final...

Un situashon ku a presentá i ku despues e presidente di hurado, sr. Billy Adams a hasi menshon di esaki ta e spit ku e tumbanan ta keda presentá...

Si mi no ta ekiboká, bo no tin mag di surpasá e tèmpo di 195 riba e metrónomo...

Ta resultá ku tin algun tumba ku a bula e tèmpo i yega 210, pa esaki no tin un sanshon i ta pe motibu ei mes presidente di hurado a hasi menshon di e spit...

Awó di mes si e spit ta haltu, bo tin chèns di pèrdè punto ora ta husga ritmo i ambiente den kaya...

E faboritonan pa awe nochi ta entre otro Ike Jesurun, Ray Lauffer, Dibo Doran, Urvin Jano, Amos Balentin i Ephrem J...

Nan 6 na nos konsepto tin tur ingrediente pa ta esnan ku ta bai skor mas haltu...

E órden di presentashon ta bai hunga un ròl i si bo no dal sufisiente duru den trempan, tin chèns ku den lat otro ta pasa kue e korona i kore bai kuné...

Tin algun kantante mas ku na nos konsepto tin chèns pa impreshoná ku nan presentashon...

Un kos ta sigur, te ku aworakí, no tin un ganadó ‘fiho fiho’...

Tur hende tin mesun chèns i mester wak ta ken ta bai tin e momentum pa awe nochi...

Sorpresa por tin semper...

Eksito na tur kantante pa awe nochi, ku e mihó gana i ku pueblo di Kòrsou haña un Rei òf Reina di Tumba ku tei pone ambiente pa nos marchanan di Karnaval...

Awe entre 5 or pa 7 or di anochi na Rincon Cubano bo tin chèns pa bai buska bo T-shirt pa e tremendo jump in di Chikitous ku lo tin mañan na Sugar...

Si bo no tin bo karchi ainda bo por pasa kumpra karchi, skohe bo T-shirt i bo ta kla mesora...

No lubidá ku awe ta te ku 7 or bo por entrega bo formulario pa partisipá na e kampaña di EXTRA pa gana e pakete pa bai wak Karnaval...

Mas formulario bo entrega mas chèns bo tin...

Felis wikènt! Disfrutá awe nochi i nos ta topa den Festival Center...