Okay, nos tei ku otro edishon di Louie Louie den ambiente di Karnaval...

E remarke ku nos tabatin relashoná ku e orario di salida di Marcha Hubenil a keda sostené pa diferente koleganan den medionan di komunikashon...

Reakshon di lidernan di grupo tambe a drenta i nos ta di opinion ku AGKK i JAG mester evaluá e orario di salida di Despedida Hubenil...

Algu otro ku mester tuma lugá e dianan aki ta e kontrol di ruta di Karnaval pa wak unda falta iluminashon pa dje forma ei Gobièrnu por aserka Aqualectra pa nan kontribuí pa alsa e nivel di iluminashon riba ruta di Karnaval...

Esaki ta sosodé tur aña, pero mester traha riba dje den awe pa djaweps i no warda ora ku ripara djabièrnè ku ta bai buska moda di drecha esaki pa marcha di despedida...

Tur aña tin diskushon di e tokamentu di Tumba durante di marchanan...

Ta dependé unda bo para ku bo ta haña tumba pa skucha...

‘Louie Louie’ ta wak Karnaval pa mas ku 15 aña kaba den Marchena i e públiko ei banda ta kustumbrá di skucha tumba paso tur banda i òf dj ke pasa na TeleCuracao tokando tumba...

Ta ora ku sigui ta kambia e ritmo i no lubidá loke hopi lider di banda a yega di splika den pasado, e doñonan di grupo ta disidí kiko e repertorio di banda mester ta i nan ta bin duna indikashon tambe ora ku miembronan di grupo reklamá ku nan ke kambio den e repertorio...

Bo ta wòrdu bon paga i bo mester toka loke ku AMI ke...

Ayera durante dje evento na Sambil bo por a komprobá kon popular e front di Gentz ta ...

E públiko di Kòrsou no tin e kustumber di ta dje fanátiko ei ku nan ke saka potrèt ku kantantenan lokal...

Aworakí e miedu ei a kita i te hasta yunan chikí mayornan a trese pa laganan saka potrèt ku Rei di Tumba, Ray Lauffer...

Awe ta fecha pa e jump in di Grupo Zjangilae...

Nan benta di karchi tambe a kana bon i ta spera ku públiko ta kaba di kumpra loke a sobra pa dje forma ei e grupo tambe por ‘sold out’ su evento i logra di rekoudá e fondo ku nan tin mester pa por partisipá na Karnaval ku mente trankil...

E kos di mas fèrfelu ta ora ku bo invertí pa organisá un evento pa rekoudá fondo i bo no logra di gana nada, e ta suak e grupo formal...

Djárason ta fecha pa BAB/ Crazy Diamonds...

Djaweps Selikor ta sera e kalènder di jump in...

Selikor a ‘sold out’ dos biaha...

Bandanan ku tin supladónan for di Venezuela i ku tei usa nan servisio pa Gran Marcha i Marcha di Despedida den e dianan aki ta kanando huntu ku AMAK e ruta pa por regla estadia di e músikonan...

Karta a ser manda pa Minister di Hustisia segun nos por a tuma nota i AMAK segun nos por a komprondé a risibí kontesta di Minister di Hustisia kaminda a indiká na e organisashon ku e músikonan tin ku kana e proseso di pidi ekstenshon di estadia konforme nos leinan...

Tin banda ta kla prepará pa esaki i a indiká kaba ku nan lo invertí den esaki paso nan tin e espasio pa esaki i ta logra di kubri e gastunan ku nan presentashonnan ku nan tin...

Otronan ta grawatá kabes, paso nan ke mantené e kalidat musikal, pero no tin e sufisiente fondonan pa por kubri e estadia di e músikonan...

P’esei ta masha importante pa bo prepará bo mes bon pa loke ta trata fondonan pa por duna e banda e luho di tin un sekshon di brass di kalidat...

No mester warda Festival di Tumba pa por logra kubri gastunan di músikonan...

Temporada di Karnaval ta un di planifikashon, ki dia ta laga e músikonan yega, pa por ensayá bon pa tumba i pa nan por keda mesora pa toka pa e diferente marchanan...

E bandanan ku tin toka tur dia por hasi e luho aki, paso nan tin entrada tur dia pa kubri e gastunan di estadia i pago na e músikonan...

Nos tei move, den henter e ambiente di e último siman di Karnaval aki, sòru pa bo saka kara di trabou tambe, ya djabièrnè bo por slep sali un tiki mas trempan...

Te mañan ku Dios ke!...