Un felis djárason na tur nos lektornan...

Ayera nochi a tuma lugá e instalashon di dranghek pa e di dos parti di ruta di Karnaval...

Na e instalashon di ‘Carnival Dome’ tabatin un aksidente den oranan di mardugá di djamars...

Segun informashon e vehíkulo embolbí den e dalmentu aki lo mester tabata koriendo demasiado duru ...

Den e dianan aki bo tin ku kore outo ku koutela riba e ruta di Karnaval sigur kaminda tin dranghek instalá...

E kaya ta bira mas smal i bo mester por maniobra bo outo bon pa evitá ku bo ta dal esaki ...

Ayera tabata anochi fecha pa e jump in di Zjangilae...

E grupo aki tambe a logra di ‘sold out’ nan evento i nos mester bisa ku e aña aki segun mi nos tei kibra un rèkòrt di asistensia na e diferente jump in ku a tuma lugá...

Públiko realmente ta spar pa por asistí na e diferente aktividatnan...

Ounke no ta mesun hende bo ta topa tur anochi tin un base si ku unda ku bo lora nan tei...

E otro grupo ta skohe algun dje aktividatnan pa nan bai...

Awe atardi te ainda den diferente dje programanan di Karnaval tabata diskutí e orario ku Marcha Hubenil a terminá...

Papiando ku un persona ku tin konosementu dje ruta di Karnaval el a splika ku ántayera nochi el a bolbe kore e ruta pa e konfirmá ku na diferente punto no tabatin sufisiente iluminashon...

E kordinashon ku Aqualectra pa esaki tuma lugá segun mi no a kana bon...

Gobièrnu komo e punto sentral di e ‘taskforce’ ku a lanta pa kordiná tur kos di Karnaval mester move pa esaki ta bon reglá pa e wikènt aki...

Ba sobra dos dia pa regla esaki pa dje forma ei garantisá e seguridat na nos hóbennan ku ta partisipá na Karnaval...

Lugánan skur ta puntonan ku por bira peligroso tantu pa e partisipantenan komo públiko pará kantu di kaya ta wak Karnaval...

Awe nochi ta BAB i Crazy Diamonds su tradishonal jump in na Emmastad...

Nos ta pendiente pa pasa einan tambe awe nochi pa disfrutá dje ambiente...

Trabounan di último dianan ta avansando na e diferente sedenan di Karnaval...

Nos a tuma nota tambe ku entre otro e kompania di zonido Massive ta trahando duru pa kaba di instalá zonido i instrumènt pa diferente agrupashon musikal...

Manera e último añanan ta e kaso esaki ta tumando lugá na un punto sentral kaminda entrante djabièrnè awor treilernan ta kuminsá sali pa bai direkshon di e punto di salida na Sta. Maria...

Ma komprondé ku tin 3 banda ku sigur a traha i ta trahando pa impreshoná mas tantu posibel ku nan treiler di banda durante di marcha...

Traha ku ‘truss’ i yena ku lus, pantaya led i diferente otro efektonan e bandanan ke demostrá ku nan ta dominá kaya...

No ta solamente e repertorio nan lo ke broma kuné pero henter e diseño di treiler i tur loke bo por imaginá bo mes ku nan ke pone riba treiler pa simplemente keda apart di tur sobrá...

E kompetensia ta un serio i bromamentu ta na òrdu di dia...

Ta rabia no mester rabia...

Korant EXTRA a djòin ku e empresa Ictual pa dje forma ei komo partner presentá e App ku ta hasiendo furor kaba den Karnaval ku ta: Unda e kabes ta? App ...

E app grátis pa tantu telefònnan ‘smart’ ta duná bu e oportunidat pa por sa presis unda e kabes i tambe e final dje marcha ta...

Tambe e app lo duna informashon di e gruponan ...

Download e App pa durante di tur e marchanan ku ta sigui aki bo por sa presis ... Unda e kabes ta? ...

E informashon ku CNSJ lo no tuma lugá den 2020 ta un sla fuerte pa nos ekonomia...

E spin off ekonómiko ku e evento ta trese ta un grandi...

Gobièrnu/ Ofisina di Turismo mester sinta na mesa ku FBI/ MOJO pa por traha riba un fecha òf temporada nobo ku e organisashon lo sinti su mes na kas...

Nan aporte durante dje último 10 añanan tabata hopi grandi i mirando e desaroyo turístiko ku ta pendiente pa sigui krese, mester, mester krea eventonan di kalidat haltu manera CNSJ...

Shonnan tabata un plaser, nos ta topa mañan ku Dios ke!...

Kuida i ban sigui traha pa adelanto di Kòrsou!...