Un bon siman Kòrsou, Aruba, Boneiru, Isla Riba i Ulanda...

Nos tabatin un tremendo wikènt tras di lomba ...

Simplemente tremendo tabata e gran final di Festival di Tumba...

Tremendo presentashon di nos agrupashonnan musikal...

Públiko tambe a komportá ala mil maravia...

Pincho Anita, a gana e premio pa Tumba Chistoso ku e komposishon ‘E infoke ta riba e Rabu’, un komposishon kompartí ku Jerrel Paula...

Premio pa mihó letra, Premio Bèti Doran a bai pa ‘Histeria Abrakadabra’, komponé pa Gregory Colina i kanta pa Amos Balentin…

Premio pa mihó areglo a bai pa Dwight Leoneta ku a gana e kompetensia ku e areglo di e tumba: ‘Kòrsou tei Bula’ kanta pa Ray Lauffer…

Premio pa promé i di dos finalista mihó areglo a bai pa Ravello Antoin pa e areglonan di respektivamente: ‘Mil i un motibu pa sigui’ i ‘Ta Fiest’i Pueblo Tin’…

E 12 finalistanan di Festival di Tumba 2020 a resultá: Raynor Lauffer; Guerson Nahr; Cuco Cruz; Luwi Jano, Roald Balentien; Djuric Virginie; Amos Balentin; Ike Jesurun; Dibo Doran; Sharrel Denisia; Furgell Wijngaarden i Michelangelo Martina…

Pabien na Ray Lauffer ku a keda koroná komo Rei di Tumba 2020…

Amos Balentin a yega serka ei ku su premiashon komo promé finalista…

Dibo Doran a dal duru ku su ‘Awó mas ku nunka’ i a keda premiá komo segundo finalista…

Urvin ‘Luwi’ Jano ta logra premio komo di tres finalista ku e komposishon di Darwin Gregg titulá: ‘Blou ku Bèrdè Kòrsou ta bai’…

E komposishon ‘Mi intuishon’ di Axel Pikero i interpretá pa Djuric Virginie ta logra kai den premio komo di kuater finalista…

Gregory Colina ta logra pa pone tres komposishon den 12 finalistanan…

Ku kuater areglo den Tòp 12 e ta enkabesá e lista di areglistanan, sigui pa Randal Corsen ku tres i Ravello Antoin ku dos areglo…

Despues di resultado tabatin yen di komentario riba e resultado loke ta algu ku bo por a spera…

E biaha aki pa diferente hende tin pregunta riba e manera di husga di huradonan…

E aña aki despues di hopi aña ku ERA no ta logra di klasifiká niun di su tumbanan den e Tòp 12 di Festival di Tumba…

Ta di aploudí tambe e logro di ONE ku ta pone 4 tumba den Tòp 12…

ICONS su tres Reinan tur ta logra di ta den e Tòp 12…

Sinku Rei di Tumba den e Tòp 12 ta indikashon ku nan ta fuerte ketu bai i no tin kestion di edat…

Tres 50 plùs den Tòp 12 ta mustra ku nan tin gasolin den tanki ainda i ora ku nan presentá tur hende mester para ketu pa nan…

Hóbennan a dominá den e Tòp 12 loke sigur ta duna indikashon ku Festival di Tumba tin futuro…

Djasabra anochi T’aki Tin a logra un biaha mas pa ‘sold out’ nan tradishonal Jump In…

Nan donashon di 25 mil florin na Karnaval ta un di esnan mas haltu ku ta keda hasí pa un organisashon ku no ta un empresa na Fundashon JAG…

Pendiente pa djamars awor tin entrega di Premio di Festival di Tumba…

Den e siman aki tambe tin 4 jump in ku sigur tur atenshon lo ta riba nan…

Trabounan den gruponan di Karnaval tambe a kue spit awó ku Festival di Tumba ta tras di lomba…

Nos tei move, bon siman!...

Mayan nos tei bek ku otro edishon di ‘Louie Louie’ den Karnaval 2020…