Un djamars bendishoná na tur nos lektornan...

Ayera nochi trempan organisadónan di Hak’e a presentá nan sombré i pèchi pa 2020...

E sombré lo bira sigur un atrakshon i mi ta premirá ku e benta di karchi pa djabièrnè den pitu aki lo bai bira mas kayente...

E loke ta bai keda ofresé djabièrnè ta un atrakshon pa hendenan mas grandi, pero mirando e interes, nos ta kere ku esnan mas yòn tambe lo bai djòin i nos ta sigur ku lo tin yen hende ku lo ke un sombré pa nan broma den kaya kuné...

Ta di lamentá e situashon ku tin kaminda un mensahe di bos a pèrkurá pa bòltu un makutu i awor tin yen puitu ku a sali...

Tin yen insinuashon riba kaya relashoná ku Fundashon JAG, e organisadónan di Karnaval 2020...

Esaki sigur ta di lamentá i na nos opinion e organisashon mester a saka un komunikado kaba pa duna aklarashon i pa terminá e efekto negativo ku esaki tin riba e selebrashon di Karnaval 2020...

E kantidat di komentarionan ku tin relashoná ku e problema ku a surgi ku ta e manera no desente pa atendé ku un dje finalistanan di Reina di Karnaval ta parse di ta e ‘Tòp’ dje seru...

Djis despues ku e mensahe di bos a bira konosí den wikènt, mesora a surgi informashon ku tin chanchuyo ku resultado di elekshon di Rei i Reina Tiner i tambe e elekshon di Reina di Karnaval adulto...

E komentarionan riba kaya a bai dje leu ei ku te asta algun hurado a kuminsá di duna informashon interno kon a yega ne resultado òf ku nan no tin bista riba e manera ku konteo di puntuashon a tuma lugá...

Ta importante tambe pa presidente di hurado por duna un deklarashon i desmentí e informashon ku tin ta sirkulá riba e resultado...

Aworakí te asta informashon di 2018 i 2019 ta riba merkado...

E informashon ku tin spònser ku a kita nan aporte i otronan ku a baha e aporte tambe a kuminsá sirkulá...

Tin te asta menshon di un spònser grandi ku ta eksigiendo dje organisashon pa nan presentá resibunan original di gastunan ku a keda hasí i pa kua e spònser a duna su kontribushon...

Den tur esaki e informashon ku Fundashon di Karnaval di Banda Bou a logra pa paga praktikamente tur su debenan ku a keda habri di 2019 ta kai komo algu ku ta suavisá e situashon...

Nan a primintí i ta kumpliendo ku nan promesa, falta algun kos pa kaba di paga den e dianan aki, pero indikashon ta ku nan ta logra di eliminá tur e debenan ku a keda habrí...

Un saludo pa e dos Lisette nan...

Sektor di Kultura mester pidi aklarashon di Fundashon JAG riba e situashon ku a presentá i e kantidat di reklamonan ku ta surgi aworakí, nèt den e último parti dje selebrashon di e temporada aki di Karnaval...

Pa e último siman di Karnaval tin un sin fin di aktividat i ta e reakshon di públiko pa loke ta kompra di karchi dje diferente eventonan lo bira e punto pa wak i evaluá...

Tur hende tin den nan boka ku e situashon ekonómiko no ta duna, pero e públiko ta sorprendiendo tur ekspektativa ainda...

Gobièrnu a informá ku lo no duna liber djamars di despedida parti mèrdia...

Nos ta spera ku despues lo no tin reklamo riba e orario ku e marcha di despedida yega su final...

Te asta ora ku duna liber bo tabatin e situashon ku empresanan privá no ta duna liber...

Awor tur hende ta kabando kasi mesun ora, pues tráfiko lo bai bira un kos serio den oranan di atardi...

Hopi lo pidi e mitar dia liber ya nan por prepará di un forma trankil pa bai nan Marcha di Despedida...

Outoridatnan a anunsiá tambe e medidanan ku tin pa loke ta trata komportashon di tantu e públiko pero tambe di esnan ku ta move ku nan vehíkulonan riba dianan ku tin marchanan di Karnaval...

E ‘Sinti un bes’ ta pèrkurá pa tur hende ta atento pa no faya ku niun lei di tráfiko pa evitá ku bo outo ta wòrdu tumá den beslag i ku bo ta keda sin esaki te despues di Marcha di Despedida...

Nos tei move, te mañan ku Dios ke!...