Un felis djárason...

Awe tardi tin rueda di prensa di Fundashon JAG pa nan duna e último detayenan pa loke ta trata Karnaval...

Awe tambe lo risibí mas informashon riba e evento di ‘Kings & Queens night’...

Ayera nochi lat Fundashon JAG a post riba nan página e siguiente petishon: Si bo a yega di sali Reina, Prens i Pancho Adulto di Karnaval Kòrsou entre 1971 te ku 2020 i no a haña un invitashon di parti Fundashon JAG pa Kings, Queens & Baluarte Night, por fabor tuma kontakto ku nos na 685-0475...

Si nan no a tuma kontakto ku bo ainda, yama e number pa dje forma ei bo risibí bo invitashon...

E evento di Kings, Queens & Baluarte Night lo tuma lugá na Sambil den e mesun área ku tin e eksposishon di Festival di Tumba...

Instalashon di dranghek a kuminsá ayera nochi i e tim ku tabata instalá a traha riba un bon spit, kuminsando fo’i Plasa Hariri i sigui bai den Otrobanda...

Ora nos tabata kabando ku nos kolumna ya e grupo a yega Roodeweg i tabata bayendo kabes pariba...

Tin algun banda ku ta ensayando e dianan aki pa nan presentashon durante di Hak’e...

Randal Corsen Orchestra ta preparando pa nan presentashon ku diferente artista invitá...

Entre nan nos a mira Mr. Saab i Doña Mistica Stefania...

E ambiente kantu di ruta di Karnaval a kuminsá kue forma...

Trabounan riba stellage ta kanando bon i ya wega di dominó i sinta dal drinks basilá riba e outonan ku ta kore bai bin a kuminsá...

Gruponan di Karnaval tambe ta trahando riba karosa, bar i detayenan final pa loke ta trata trahenan di Karnaval...

Tin grupo ku ta basta avansá, tin otronan ku ke sinti e kayente i ta trahando e dianan aki den tim pa kaba trahenan...

Ayera ora ku koriente a bai, mi mente a pasa mesora riba e kosedónan ku ta trahando riba e trahenan...

Ta kestion di sea kòrta tela prepará pa ora koriente bini bèk pa sigui kose òf mester a sinta bon mucha i warda koriente bin bèk...

Transformashon di Festival Center ta tumando lugá den e dianan aki...

Manchi Harms i su tim tei bolbe kombertí Festival Center den un lugá úniko pa e edishon # 5 di Hak’e...

Pèchi i Sombré ta konosí, entrante mañan por bai buska bo pèchi òf sombré na ofisina di Volkswagen na Skèrpènè ...

Fundashon JAG ke sinta na mesa ku stakeholdernan di Karnaval pa diskutí riba Marcha Hubenil i Parada di Tiner...

E organisashon ta di opinion ku ámbos evento ta koriendo peliger i mester aktua awor promé ku ta lat...

E idea ta bon, pero mester invertí den gruponan Hubenil pa alsa nan nivel i bolbe trata loke ku na 2015 a keda hasi, esta involukrá skolnan den Marcha Hubenil...

Un ehèmpel di esaki ta e marcha di skolnan ku ta tuma lugá na Bándabou ku e aña aki lo tin partisipashon di 1000 mucha...

Aña pasá e marcha di Bándabou a logra di atraé mas o ménos 3 mil mucha...

Segun Fundashon JAG nos Karnaval a bira karu, sigur pa loke ta trata Hubenil i Tiner...

Nos ta duna nan rason i ta kere firmemente ku bo mester ta kreativo pa por logra yega na konseptonan mas barata i ku ta lusi tòg...

Un punto masha importante pa kualke organisashon ta ku ora bo logra di atraé un spònser pa bo kumpli ku e dil pa dje forma ei pa e siguiente añanan bo por sigui konta ku nan aporte...

Hopi biaha ta neglishá esaki i ta pone ku ounke bo start ku un proyekto di amplia gruponan, si bo no tin aporte di spònser esaki lo no logra...

Nos tei move, pa mañan nos tin otro edishon di ‘Louie Louie’ den Karnaval 2020...

Te mañan ku Dios ke!