Un felis djamars na tur nos lektornan...

Awe ta dia di San Valentino... ‘DEN E BEMBE’ ta deseá tur su lektornan un felis dia di San Valentino...

Dia di Amistat i Amor...

Awe ta dia ku komersio ta haña un blo, for di flowershop, lingerie, blas ku kontenido i asina bo por sigui menshoná ta hopi regalo ta keda repartí...

Awe ta dia tambe ku bo por evaluá kon dichoso bo ta na Amistat i Amor...

Awe ta dia di dal un kamisa kora i baha manera un gran galan òf gran dama i spera Kupido yega pa flecha bo ku su flecha di Amor...

Ban pa Karnaval, e lista di gruponan ta konosí i den e dianan aki ta trabou duru tin na diferente sede pa por kaba tur loke ku tin mester pa gruponan lusi bunita durante di nan presentashon den un dje marchanan di Karnaval...

Ma tuma nota di situashon ku mi ta premirá tei bolbe bira un tópiko kayente den fin di Karnaval aki i farándula di Kòrsou engeneral...

Mi ta pendiente pa haña ‘green light’ pa los kos, pero mester warda mr. Presidènt...

Otro mañan nos ta pendiente pa e Fiesta pa Grandinan ku anualmente ta keda organisá...

No tin masha detaye e aña aki unda e fiesta lo keda organisá...

Ta siman tambe pa ‘Ban Pariba Electric Parade’, Jump In di SGO, Glow in the Dark Jump In, tur tumando lugá djabièrnè awor...

Djabièrnè ta fecha tambe pa Festival di Tumba di Bándabou...

Pa djasabra ta Fiesta di Karnaval di Lions Club, Jump In “Hak’e” i Jump In ‘Moonlight Edition’...

Djadumingu ta Marcha Hubenil i asina e siman grandi di Karnaval 2017 ta kuminsá...

Ora siman bòltu, bo tin djaluna Jump In di SOAB

Djamars ta Zjangilae su turno ku e popular Jump In di Pòstkantor

Djárason ta fecha pa Jump In di BAB i Crazy Diamonds, den kura di Ontvanger na Kwartier...

Djaweps ta Jump Up di Blitz i Carnival Republic...

Ta basta aktividat tin, anto esakinan ta sin hasi menshon di otro selebrashonnan di Karnaval priva di entre otro kompanianan lokal...

Un dje aktividatnan ku tur aña ‘DEN E BEMBE’ ta sostené ta esun di Kiwanis Club Kòrsou i Totolika...

Djabièrnè awor nan tin nan ‘Karnavalika’, un jump up/ jump in spesialmente pa e miembronan di Totolika...

Ora bo mira e miembronan gosa bo ta ripara ku meskos ku nos tur nan tambe tin derechi di gosa i danki na Kiwanis i direktiva di Totolika ku anualmente ta pèrkurá pa esaki sosodé...

Bon a yega ora pa nos bai disfrutá di nos Dia di San Valentino, mi ta sinta aki ta warda e promé hende ku lo ke duna mi un tiki atenshon awe...

Enjoy bo dia, nos ta topa mayan ku otro edishon di ‘DEN E BEMBE’...