Un bon siman na tur nos lektornan...

Awe nos ta start ku nos promé edishon di ‘DEN E BEMBE’ den temporada di Karnaval...

Djasabra último a tuma lugá e apertura di Karnaval ...

Tantu promé komo te hasta aworakí tin reklamo i òf opservashon riba e desishon ku Fundashon JAG a tuma pa organista e apertura i kombiná e muzik di Karnaval manera Tumba i Roadfire ku e género Urbano...

E konsierto di djasabra anochi di ‘2 den 1’ a resultá un éksito...

E organisashon a logra di bende e konsepto bon ku hubentut ku a akudí na kantidat grandi i mei mei di nan esnan di mas edat sigur a disfrutá na inisio dje anochi ora ku bandanan lokal tabata presentá...

Komo evento kultural, Karnaval no meresé un meskla di Tumba ku muzik urbano, pero pa e organisashon ku ta buskando moda pa rekoudá fondo pa por organisá tantu Karnaval di Bándabou i esun Pariba ta nesesario pa organisá un evento kaminda mas tantu hende posibel ta kumpra karchi...

Si bo wak e evento puru riba ‘negoshi’, nan a logra nan meta...

Awor nos por keda diskutí te ku djárason di shinishi si mester a aseptá e meskla di e dos géneronan di muzik...

Apertura di Karnaval tabata ‘lit’ manera hóbennan sa bisa...

Loke si mester tene kuenta kuné i ku nos ta desaprobá ta loke nos a komprondé ku a sosodé ku tabatin artista ku a kanta i òf instigá e públiko pa kanta palabra malu, ami no a tende, pero a manda mensahe ku e informashon ei pa mi...

Tende ki, ‘Bragadam’ a resultá un éksito...

E jump in di Grupo Isla pa hopi tabata un interogatorio debí na e fecha tempran den temporada di Karnaval, pero amantenan di Jump In a demostrá otro...

Bon públiko i bon ambiente a pèrkurá pa e hendenan gosa durante dje jump in organisá pa Grupo Isla...

Djabièrnè atardi Lions Club a organisá un rueda di prensa kaminda nan a anunsiá nan fiesta di Karnaval pa 2018...

‘Bin, Bula’den’ e tema di Lions pa 2018 ta konta ku animashon di dj Boogieman, ERA i e orkesta di Randal Corsen...

Karchinan pa e fiesta aki ya ta optenibel na Mensing’s Caminada i serka miembronan di Lions Club...

E fiesta ta tuma lugá na Fort Nassau i e set up kompletu di e fiesta ta kambia pa e aña aki...

Keda pendiente pa bo risibí mas informashon dje tremendo fiesta di Karnaval di Lions Club...

E agrupashon musikal ‘ONE’ a presentá nan spònsernan i gruponan ku nan lo kompaña musikalmente pa temporada di Karnaval 2018...

E banda a presentá tambe 3 tumbero ku lo partisipá den Festival di Tumba...

Xavier Navarro, Stanley Clementina i Dibo Doran lo partisipá ku ONE den Tumba 2018...

Papiando di Festival di Tumba, mañan lo tin su di 2 rueda di prensa relashoná ku Festival di Tumba...

Ma komprondé ku nan tin 5 brandingpartner i ta pendiente pa 2 mas ku lo mester disidí si nan ta partisipá komo spònser den Festival di Tumba 2018...

Pa mañan tambe lo bira konosí ken ta e persona ku lo dediká Festival di Tumba 2018 na dje...

‘DEN E BEMBE’ ta na altura dje nòmber kaba, pero nos no ta interesá pa publiká e nòmber ainda, laga e organisashon hasi su anunsio ofisial...

Echo ta ku AMAK a tuma un bon desishon di dediká e festival na 1 persona i no na 2 manera esaki tabata planiá òf a keda presentá...

Pleitu entre un promotor/ lider di un banda a pone ku e promotor awor ta sinta dede krusá pendiente pa wak kiko AMAK por logra na Aruba ...

E pleitu entre nan dos a kaba ku pidimentu di despensa, pero esei no a yuda pa e banda bin toka den e jump in dje promotor/ lider di grupo di Karnaval...

AMAK a keda pa bai Aruba pa promové Festival di Tumba 2018 i na mes momentu kombersá ku e Minister nobo di Hustisia i Kultura pa wak si por bin adaptashon na e akuerdo di presentashon di músikonan na Aruba i Kòrsou...

Te ku awe, Buleria por partisipá na Festival di Tumba pero no ta permiti’é pa partisipá den niun Jump In i e por partisipá den ‘Marcha di Despedida’...

Ban wak kiko lo ta e resultado dje kombersashonnan bilateral ku AMAK lo ke hiba na Aruba...

Ensayonan pa Festival di Tumba a start i djadumingu awor ta inskripshon pa Festival di Tumba...

Nos tei move. Mañan nos tei bek ku mas informashon di Karnaval di Kòrsou...

Bon siman !