Un felis djabièrnè na tur nos lektornan...

Nos a yega fecha pa e Final di Festival di Tumba 2017...

30 finalista i 13 banda pa kompaña nan...

Awe nochi Kòrsou lo ta praktikamente paralisá i na kualke parti di mundu kaminda tin 1 hende ta papia papiamentu nan lo ta siguiendo e transmishon di Festival di Tumba...

Teknologia a pone ku praktikamente rònt mundu por sigui kualke suseso i e mesun teknologia ei tei pèrkurá awe pa unda ku bo ta riba e planeta aki lo bo tin chèns di sigui nos Festival di Tumba...

Den e parti negativo tambe, teknologia a pone ku a ‘hack’ e sistema di streaming i pone ku UTS tabata na kareda pa por a blòkia un persona ku a hasi su mes kulpabel ku ‘streaming’ ilegal...

Ayera nochi durante dje rueda di prensa di AMAK nan a para ketu na e situashon ku a presentá i ta pendiente pa awe hasi un kontrol stringente riba esnan ku buska moda pa di forma ilegal piratiá e señal i ofresé esaki di forma ilegal na otronan...

Pa awe na Kòrsou lo tin transmishon di e final di Festival di Tumba via di TeleCuracao, TV Direct i tambe Nos Pais TV...

E aña aki tin masha hopi malkontentu ku e resultado di e 30 finalistanan...

Esnan malkontentu a bai dje leu ei di insultá presidente di AMAK na e formanan mas baho ku tin...

Feco a lamentá e atakenan riba facebook i otro retnan sosial...

Pero a indiká mesora ku no por menas’é dje forma ei i ku e tin su 2 yunan pa defendé...

Feco a splika bon kla ku mester siña respetá desishon di hurado i ku kada persona mester tin espasio pa selebrá viktoria, pero mester por aseptá derota tambe...

Un punto importante durante di Feco su disertashon ayera nochi ta na momentu ku el a hasi menshon dje regla ku si bo falta ku reglanan doméstiko di AMAK bo tin chèns di wòrdu raya for dje organisashon...

Feco ta lamentá ku tur esnan ku ta kritiká no tin e kurashi di bin ekspresá nan reklamo den su kara pa e kontestanan...

Finalmente Feco a indiká ku e si ta kontentu ku e anunsio dje 30 finalistanan i manera el a splika tin un balanse entre edat i eksperensia...

By the way, pa awe nochi e bandanan ku ta den final tin 2 opservador ku lo por tuma nota dje kontrol final di e akountent ku ta enkargá ku supervishon di votashon di miembronan di hurado...

Manera a keda palabra den reunion di AMAK, ayera nochi a skohe e dos opservadornan i esakinan lo ta representante di e agrupashon musikal “K’ribe” i “Magic Sound”...

Nan 2 lo tin ku apuntá 1 persona di kada organisashon ku lo bira e opservadó...

‘DEN E BEMBE’ ta deseá éksito na tur e kantantenan ku ta den Final di Festival di Tumba...

No tin un faborito fiho, pero mester hasi menshon di sigur 5 kantante ku nan tumba tin tur ingrediente pa bira esun ganadó, ta kestion di ken lo tin e mihó momentum awe nochi i ku nan impreshoná e hurado i tambe e públiko den Festival Center...

Nos ta topa, ami tei deskansá, awe nochi lo ta un anochi largu, pero di goso ...

Ku e mihó gana !