Un felis djárason mi pueblo...

Siman a parti na dos aki i ya nos mester kuminsá tira un bista riba loke ta na kaminda pe wikènt aki...

Djabièrnè awor tin e dòbel jump in...

Fecha pa jump in di MCB i tambe esun di SVB...

Festival di Tumba di Bándabou ta djasabra awor, 11 di yanüari...

Nos no a risibí masha informashon di Fundashon di Karnaval di Bándabou, pues nos ta keda debe bu informashon relashoná ku esaki...

Riba e mesun djasabra aki tin e jump in di T’aki Tin na Lanthùis Brakkeput Mei Mei...

T’aki Tin ta sigui yuda gruponan, manera nan a hasié fo’i despues ku e grupo a tuma desishon pa stòp di bai Karnaval...

Despues dje evento T’aki Tin ta duna su aporte na diferente grupo...

Djadumingu 12 ta fecha pa elekshon di Reina, Prens i Pancho di Bándabou...

Djadumingu awó ta Parada di Kabai 2017, pa esaki tampoko no tin masha informashon ainda...

Ayera nochi a tuma lugá entrega di premio di Festival di Tumba ...

AMAK a repartí su premionan pa e kantante, kompositor i areglistanan ku a kai den premiashon...

Segun mi ku tin algun kantante ku mester tin 10 televishon na kas...

Jano ku Ike mester a lanta kompania di hür televishon...

Ma tuma nota ku Polis i e instansianan di kontrol a pasa riba e ruta i ‘ruim op’ tur loke a keda poné riba e ruta...

Fecha pa pone stellage ta djasabra awor, ta di lamentá ku no a sali niun komunikado dje sektor di Kultura pa indiká e fecha...

E hendenan a kustumbrá ku ta riba e djasabra despues di Festival di Tumba ta pone stellage...

Awó ku UTS a indiká ku nan no ta produsí Festival di Tumba mas, tin yen di hende ku ta spekulando kon henter e produkshon lo bai tuma lugá...

Te hasta nòmber di algun persona a kuminsá zona ku den pasado a produsí Festival di Tumba...

Mi a tende yen tipo di ‘set up’ ku lo por bai traha pa produsí Festival di Tumba...

Ma yega na e konklushon ku tin hende ta kere ku pa produsí Festival di Tumba ta un ko’i depchi ku diesplaka...

Ban serio, mi ta kere ku AMAK i Gobièrnu, Ministerio di Enseñansa, Siensia, Kultura i Deporte su sektor di Kultura i Deporte mester sinta na mesa pa dje forma aki yega na un fórmula pa ku kontinuashon dje produkshon grandi di Festival di Tumba...

Si tin un malkomprondementu ku UTS mester wak si ta logra pa solushoná esaki òf mester kuminsá sondia otro posibilidatnan, pero no bai drumi warda òktober òf novèmber pa kuminsá prepará...

Meskos te kaso ku ‘branding partner’, mester traha fo’i tempran. E produkto tin sufisiente material pa demostrá su grandesa...

Djaweps awó, esta mañan tin e sakamentu di numerashon pa Karnaval...

Ta e dia ku lo tin yen dilmentu pa kambia di number...

Ounke ku e aña aki pa Gran Marcha tin mas grupo ku ta pega na otro pa motibu di kompartí banda òf e loke ku a bira konosí komo Dreams 1 i Dreams 2, anto ku ERA 1 i ERA 2...

Ta yen moveshon lo tin, pa gruponan ta tras di otro pa dje forma ei por hasi kambio di kantantenan sin ku mester kana distansia largu...

Bon nos tei move, mañan nos tei bèk ku mas informashon di Karnaval...