Un felis djaweps pa nos lektornan...

Ayera AMAK a tene rueda di prensa pa duna informashon riba Festival di Tumba 2026...

Tremendo eskoho pa dediká Festival di Tumba na Ike Jesurun...

Ike ta un baluarte grandi di Festival tantu na su partisipashon personal, pero tambe komo kompositor ku a komponé un kantidat grandi tumba pa diferente partisipante por a partisipá na e Festival...

Ike a toka, komponé, areglá i kanta den Festival di Tumba...

E interes pa Festival di Tumba ta grandi atrobe sigur si bo tuma nota kon tur hende ta puntrando ta ki dia lo tin ‘early bird’ pa Pay Per View...

‘DEN E BEMBE’ a komprondé ku otro siman AMAK lo tene un rueda di prensa pa duna informashon riba e sistema nobo ku nan lo bai usa pa ‘streaming’ di e Festival...

E relashon ku e spònser ku tabata atendé e transmishon PPV a terminá i aworakí tin un sistema nobo di abono i pa esaki lo duna splikashon otro siman...

Pa e ‘streaming’ tin un kampaña grandi kaminda kumprando bo pakete lo bo tin chèns di gana te asta un outo nobo, 5 mil florin kèsh i diferente otro premio...

E tim di AMAK a traha duru pa logra un kantidat grandi di partner pa e Festival, esaki no ta engrandese e Festival so pero tambe ta duna e chèns pa por hasi inovashon i trese kambio na benefisio di e públiko den Festival Center...

Ayera nochi Giovanni Atalita a duna informashon riba e partisipashon ku kompañamentu pre programa...

Nos a publiká un artíkulo apart riba esaki...

Otro punto tambe ku ta interesante, AMAK a bolbe konfirmá ku nan lo tin un ‘pool’ di brass atrobe pa duna sosten na e bandanan ku tin mester di esaki...

Bandanan tin chèns te ku djabièrnè awor, 9 di yanüari 2026 pa inskribí nan mes serka Giovanni Atalita pa por konta ku e sosten di supladónan profeshonal...

Pa mayan nos lo kompartí informashon riba diseño di “stage” i sobra informashon di kon e “setup” di bandanan lo ta riba “stage”...

Ta sigui inová i trese kambionan pa e show ta mas atraktivo...

Kantante i su bailarinnan lo ta den spòtlait na e manera ku e “stage” a keda plania pa e aña aki...

Pa mayan nos lo tin mas informashon manera mi a indiká...

Liga Blowi tambe ta pendiente ku nan “fundraising” den kuadro di nan biahe pa presensia e selekshon di Kòrsou den Mundial di Futbòl...

E grupo tin un jump in pendiente i ta trahando duru pa nan rekoudá fondo...

Nos ta wanta nos kolumna awe te aki, sperando ku bo a risibí basta informashon...

Nos tei bek mayan ku poder di Dios ! Felis dia...