KOLUMNA

Un felis djamars pa tur nos lektornan...

Gruponan di Gran Marcha ta den e fase final di nan preparashon...

Tin gruponan ku a kana bon organisá ku entrega di paña, miéntras otronan ta duna e miembronan e oportunidat pa bin kaba di ‘pimp up’ nan trahe na sede...

Tin gruponan ku ta trahando riba último detayenan i otronan ku mester kaba ku dekòr...

E dianan aki nos no tabatin kolumna tumando na konsiderashon ku ta basta potrèt a wòrdu saká dor di nos fotógrafo i nos lo kier a duna oportunidat pa bo tambe por wak mas tantu potrèt posibel...

Mester duna Beehives kòmplimènt pa un Marcha Hubenil sin niun insidente partikular. Kosnan a kana bon di kuminsamentu te final...

E punto di diskushon di tokamentu di tumba hubenil durante dje Marcha Hubenil i tambe Despedida Hubenil por wòrdu solushoná masha fásil...

Beehives ta duna sosten finansiero na gruponan di Marcha Hubenil, pone den e kontrakt ku nan mester kumpli ku e eksigensia di toka tumba...

Ku esaki bo ta evitá ku ta keda sin toka e tumbanan hubenil...

Otro punto ku mester traha riba dje ta traha pista dje 7 tumbanan finalista i sòru pa DJ-nan ku ta toka den Marcha tin nan disponibel pa por wòrdu presentá...

Bo ta move ku e kantantenan di un grupo pa otro i laga nan kanta nan tumba...

Regalá e gruponan hubenil e tumbanan finalista pa nan por traha nan koreografia riba esaki, pa ora e tumba keda presentá, e muchanan por baila e koreografia spesial pa esaki...

Nos mester ta kreativo den kon por yuda solushoná i duna oportunidat pa tene Festival di Tumba Hubenil bibu...

Ta hopi esfuerso ta wòrdu hasí pa e festival pa despues esaki no tin su efekto ora bo yega e marchanan...

E piesanan mester zona na radio tambe, esei tambe ta algu ku mester traha riba dje...

Ban bèk pa Marcha Hubenil...

E treiler ku mester a wanta un ratu na viadùkt den kaya grandi Otrobanda, mester wak kon ta hasi adaptashon pa e por pasa ku mas trankilidat i sin stress di shofùr bou di viadùkt...

M’a mira Suri, pará kantu di kaya pa wak Marcha Hubenil ta yuda kita ‘dranghek’ pa trèker por a bòltu djaki banda pa pasa bou di viadùkt...

Mester a sòru pa el a logra pasa na e parti mas haltu, pero ideal ta si por baha sikiera 10 centimeter p’e por pasa trankil...

Riba djasabra último Beehives a bishitá Hamied na Brievengat kaminda e direktiva tabatin e oportunidat di por a topa tambe ku baluarte di Karnaval 2026, Mocky Job ku ta un dje klientenan di e sentro...

‘Great’ ku nan por a brind’é su homenahe i tambe saka potrèt kuné pa rekordá e momentu akí...

Mañan 11 di febrüari nos ta pendiente pa bai e rueda di prensa di Taskforce Karnaval Bándabou...

Nan a organisá un rueda di prensa pa duna tur detaye di Karnaval di Bándabou i e aktividatnan relashoná ku esaki...

Polis tambe lo ta presente pa duna detaye riba kon nan lo atendé ku mantenshon di órden públiko djasabra awor...

Calle 9 ta djasabra awor, un festival di muzik den Pietermaai ku entrada grátis pa públiko...

A promové un ‘battle of drums’ i awor a hasi menshon tambe di presentashon di ICONS, ONE i ERA...

‘Great’ ku ta duna ‘bida’ bèk na e evento ku tabata un éksito den dékada 90 i inisio di 2000...

Awor públiko tin ku respondé dor di asistí na e evento...

Bo ta kòrda kon ántes tabatin bida den Otrobanda riba e djasabra bispu di Gran Marcha...

Kuminsá for di Chati ku su stèlazje ta basha muzik banda di brantwer, siguí pa presentashon di entre otro Doble R na Topogigio...
Sigui bai pariba den Rodeweg bo topa e stènt di KPMG ku tabata sòru pa masha ambiente mes...

Djei ta banda di Malboro ku Spong tabatin nan ambiente pa despues bo yega Colon kaminda Radio Hoyer i despues tambe Radio Jumbo/ Hit 100.3 tabata sòru pa tremendo ambiente...

Anto no lubidá den kurá di Z, ku diferente banda tokando pèrkurando pa un ambiente total...

E bispu di Gran Marcha tabata un ambiente di kita sombré ku tabata sòru pa e hendenan ku tin stèlazje praktikamente kamper di djasabra bai kue djadumingu den nan stèlazje pa gosa di ambiente di Karnaval...

Den e siman akí tin ainda 3 ‘jump in’ grandi ku ta tuma lugá awe, mañan i djaweps kaminda ta spera un kantidat grandi di públiko...

Kòrda komportá pa evitá kualke problema...

Nos t’ei move, tin ta gosa tur dia, otronan ta prepará pa nan partisipá den Karnaval, otronan ta sinta basilá den nan stèlazje i tin otronan ku ta ‘chill’ warda wikènt yega pa nan lòs laga bai...

Felis dia, te mañan ku Dios ke !...