Temporada di Karnaval a keda habri ofisialmente djabièrnè último i awe djaluna ‘Louie Louie’ ta start ku su kolumna di Karnaval...

Un bon siman pa tur nos lektornan...

E temporada aki lo bai bira un kaminda nos lo bai wak kon e públiko ta bai reakshoná riba nan asistensia na aktividatnan di Karnaval mirando e situashon ekonómiko...

Djabièrnè tabatin tòg basta hende kantu di kaya pa sali i disfrutá di e jump up di apertura di Karnaval...

Tin hende a indiká ku ta kaba e aña a kaba di bòltu i tabata muchu trempan, pero mirando e kalènder di aktividatnan, no tabatin otro manera...

E hecho ku e aktividatnan tabata den e promé wikènt di aña a trese kuné ku no tabatin masha dia pa hasi promoshon tantu pa e jump up komo e konsierto di Carnival Village...

Bo mester tin algu realmente ‘hot’ pa bo trèk e públiko bai bo evento, paso nan a skohe kaba kiko nan ta bai hasi ku tur e aktividatnan ku tabatin den desèmber i tambe na komienso di yanüari aki...

Na mi konsepto, si mi ke protehé temporada di Karnaval mi mester implementá e artíkulo 47 di e lei di Órden Públiko...

Brass Revolution a toka djabièrnè i tambe djasabra na ámbos aktividat di Fundashon JAG...

Djasabra ma skucha nan pa promé biaha i mester bisa ku e brasbènt ta zonando bon, falta un tiki di frus pa kita, pero nan ta hasi skuchamentu di brasbènt un plaser atrobe....

Otro gruponan por siña di nan, tokamentu duru no te kos, zona limpi te kos!...

E konsierto di djasabra no a resultá loke ku Fundashon JAG a spera pa loke ta trata kantidat di públiko ...

E organisashon su relashon públiko mester traha mas zeta pa dje forma ei traha riba promoshon adelantá den tur medionan di komunikashon...

Nos tei pa duna sosten na eventonan di Karnaval, pero e organisashon mes mester sòru pa promové e eventonan serka tur medionan di komunikashon...

Bo korant faborito, EXTRA djasabra anochi a transmití riba su página di facebook e konsierto di Carnival Village i ta sumamente kontentu ku e reakshonnan ku nos a risibí i e kantidat di públiko ku a sigui e transmishon...

Nos ta pendiente awor pa transmishon di Inskripshon di Festival di Tumba ku lo tuma lugá dia 19 di yanüari próksimo...

Meskos ku tabata e kaso e último 2 añanan e biaha aki tambe nos ta pendiente pa trese un bon produkshon pa e siguidónan di Extra tantu riba Facebook, YouTube i ta pendiente tambe konfirmashon di otro plataforma mas kaminda e inskripshon di tumba lo keda transmití...

E siman aki ta siman di apertura di Karnaval di Bándabou ku manera a keda anunsiá lo tuma lugá na bich di Kenepa...

Nos ta pendiente pa den e siman aki risibí mas informashon riba e apertura di Karnaval di Bándabou...

Rignald i Johnny ta trahando duru pa huntu ku Lisette ofresé e pueblo di Bándabou algun aktividat di nivel...

AMAK ta trahando duru pa hasi e di 50 edishon di Festival di Tumba un grandi ...

Djabièrnè último nan a firma kontrakt ku TDS pa loke ta trata transmishon di Festival di Tumba via di PPV i ta pendiente pa den e siman aki kuminsá promové e benta di PPV ...

Apart di esaki nan ta pendiente pa djaweps awor tene un rueda di prensa pa anunsiá tur detaye relashoná ku Festival di Tumba...

Dibo D a konfirmá ku e kombinashon di dje ku Randal Corsen ta ripití pa Festival di Tumba 2020, ‘never change a winning team’...

Gentz tambe den entrevista  konfirmá Ray i Henry B komo esnan ku ta bai tumba ku e banda i ku nan ta pendiente pa sigur 2 kantante mas ku lo partisipá ku e banda den Festival di Tumba...

Papiando di Gentz, nos a tuma nota di Clinton Hato ku e banda for di den luna di desèmber i awor ku temporada di Karnaval a kuminsá e ta presentando ku e banda ainda...

Di informashon ku nos a risibí ta indiká ku Clinton ta un refuerso temporal pa Gentz, pero e intenshon ta ku ora e kaba di kumpli ku su kompromisonan ku Hype ku e intenshon ta pa e pasa pa forma parti di Gentz...

Great pa mira Clinton komo un hóben ku a kuminsá kanta ku Karabela pa awor e ta den e proseso pa bai forma parti di otro banda grandi, den e kaso di Gentz, previamente ela forma parti di Gio Fuertismo tambe ...

Bon nos tei move, Karnaval a start i ‘Louie Louie’ tei pa kubri tur detaye di Karnaval 50...