Un bon siman pa tur nos lektornan...

Un wikènt kargá ku kos bon so ta loke nos tabatin tras di lomba...

Djasabra pueblo di Kòrsou por a disfrutá di un tremendo Festival di Tumba...

E hóbennan sin duda a duna un tremendo presentashon i un kos ta sigur, nos Festival di Tumba tin futuro aden...

E kantidat di públiko ku a asistí tambe tabata bastante i ounke ‘Louie Louie’ tabata parti patras den Festival Center preparando pa Inskripshon di Festival di Tumba, nos por a sigui partinan dje Festival Hubenil i a gosa kon e hóbennan a duna nan presentashon...

Pabien na ‘Richie Rich’ i su tim...

Festival di Tumba 2020 ta un kos serio...

Ma gosa kon ayera e un públiko grandi a asistí pa por presensia e inskripshon di Festival di Tumba...

Na Kòrsou nos tin hopi dama bunita i ayera Festival Center tabata manera un sentro di Damanan bunita...

E públiko di e aña aki segun mi tabata mas grandi ku e último añanan...

E partisipashon ta praktikamente igual na loke ku ta kustumber e último añanan....

Hopi entusiasmo di partisipantenan ta loke ta duna un espektativa na loke ku tei wòrdu presentá entrante otro siman...

Ayera nos a haña un kolombiano, residensiá pa basta aña na Kòrsou ku a inskribí...

Un italiano trombonista ta na Kòrsou pa partisipá na Festival di Tumba ku WESU...

Ayera nos a entrevist’é durante dje transmishon di EXTRA i e hóben aki ta impreshoná pa nos músika i e intensidat ku nos músikonan ta presentá e tumba...

Lo ta interesante pa tende su reakshon ora ku e kaba di presentá ku WESU otro siman...

Un dato interesante ta e echo ku e kantidat di supladónan ku a keda kontratá a baha...

Ayera Giovanni Atalita di AMAK a konfirmá pa ‘Louie Louie’...

A registrá primeramente 36 supladó, pero al final ta biniendo ménos ...

Pa djárason awor ta kalkulá ku praktikamente tur e supladónan lo ta na Kòrsou pasó bandanan lo a kaba di harma e tumbanan i ensayo ku sekshon di brass lo ta na òrdu di dia...

Ma tuma nota ayera ku durante di hopi dje entrevistanan ku e bandanan no a kuminsá harma e tumbanan ainda...

Den e siman aki tur kos lo tin ku tuma lugá, loke ta pone preshon sigur riba e músikonan pa kapta e areglonan nobo...

Kenley Jansen mes a enkabesá e tim di ICONS ku a bai inskribí ayera ...

E hungadó di beisbòl profeshonal ta e doño di e banda i ta sigui delaster un detaye dje banda djaserka...

E aña aki el a disidí di bin inskripshon ku su banda...

Promé ku ICONS a drenta Festival Center ayera tardi, nan a para pafó i hasi un orashon promé ku nan a sigui kana i drenta paden...

Dibo Doran i Farley Lourens ta den kompetensia...

Tantu Dibo komo Farley no tabatin planiá pa partisipá i ayera nan a inskribí nan tumba...

Un konosido músiko a bisa ayera tardi ora el a tuma nota ku tur dos a inskribí ku pa e ta great ora bo ta den kompetensia ku nan, pasó bo sa ku nan ta bin bon i abo tambe mester ta bon!...

Excellence Band a presentá ayera nochi despues ku a saka e órden di presentashon di bandanan pa Festival di Tumba...

E banda a duna un bon presentashon i na vários okashon e públiko a kanta i bati man pa e músikonan...

Pa e banda sigur esaki ta un estímulo mirando ku e públiko a kuminsá reakshoná riba e músika ku nan ta presentá...

E siman aki ta siman di elekshon di embahadornan di Karnaval...

Na Aruba den wikènt ei e elekshon a tuma lugá i esaki a kaba pasa di 3 or di mardugá...

Na Kòrsou nos tin tres dia tras di otro ku tin elekshon, kuminsando djabièrnè ku elekshon di Rei i Reina Tiner...

E ‘Tertulia ku Reinan di Tumba’ a resultá un tremendo programa...

Ayera tabatin su estreno promé ku Inskripshon di Tumba...

Mirando e reakshon ku EXTRA  a risibí nos ta planiando pa bolbe ripití...

Pa esaki keda pendiente pa e anunsio ku lo tuma lugá den e siman aki mes...

E trabou konhunto di personal di EXTRA i e tim di produkshon di Q Productions ayera a bolbe saka kara ku e transmishon ...

Mirando e kantidat di reakshon i kantidat di persona ku a sigui e inskripshon nos ta gradesido na e aseptashon di e transmishon...

Hopi hende a sigui e transmishon tambe via di TDS, loke ta di aploudí...

Keda pendiente pa e siguiente transmishonnan di EXTRA Digital ku lo tuma lugá den e temporada di Karnaval 2020...

Nos tei move, tabata un plaser, pa mañan nos lo tin mas detaye riba Festival di Tumba 2020...

Bon Siman!...