Un djamars bendishoná na tur nos lektornan...

Ayera tabata ‘The Day After’ inskripshon i ya kaba komentarionan a start pa loke ta trata e partisipashon i kombinashon ku tin entre kompositor i kantantenan...

Great pa tuma nota ku tin kuater Rei di Tumba ku a gana e korona ya na tres okashon ku ta den kompetensia pa gana e korona pa un di kuater biaha...

Farley Lourens, Ike Jesurun, Urvin Jano i Amos Balentin ta den e bataya...

Dibo Doran i Farley Lourens nan partisipashon te ku un siman pasá no tabata sigur, pero despues di ayera, nan ta den!...

Na total tin 6 eks Rei di Tumba den e kompetensia...

Otro kompetensia ku tur aña tin masha atenshon pe ta esun di miho areglista...

Ike Jesurun ta enkabesa e lista ku 6 areglo ...

Nos tin tres areglista ku tin areglo di 5 tumba na nan enkargo....

Ta trata di Gregory Colina, Randal Corsen i Titi de Palm...

Ku kuater areglo tin Dwight Leoneta, Axel Pikero i Axel Concencion...

E siman aki ainda tin trabou ta tumando lugá na diferente sedenan di grupo...

Pa otro siman  si e ta bira manera ‘Siman Santu’, tur hende su focus ta riba Festival di Tumba...

Pa esnan ku a pidi pa ripití e ‘Tertulia ku Reinan di Tumba’, keda pendiente pa un fecha den e siman aki mes kaminda lo bolbe pasa e tremendo produkshon aki ku a hala atenshon djadumingu último...

Cuco Cruz definitivamente a konsagrá su mes komo un tumbero pa historia...

E aña aki lo e bai partisipá pa di 34 okashon na Festival di Tumba i ta bira dje forma ei tambe e kantante ku mas partisipashon na e festival mas grandi di Kòrsou...

AMAK a produsí un buki

‘Historia di AMAK di 1971 pa 2020’...

Un buki ku ta kontené basta informashon i ku nos lo trata pa kompartí algun detaye interesante di esaki...

Djadumingu a hasi entrega dje promé ehemplar dje buki na Minister di Kultura...

Un dje bandanan ku tin sigur mas ku 10 aña no a partisipá na Festival di Tumba tei bèk...

Ta trata di Rizam ku tei kompaña Germain Cristina i Tela Sambo...

Tela ta forma parti di un total di 11 partisipante femenino ku lo ta den kompetensia e aña aki den Festival di Tumba...

E siman aki AMAK tei atendé tur asuntu di badge, ban spera ku músikonan lo mèldu ku nan karnèt trempan pa hasi e trámitenan, ya ora djaluna yega bo no ta tende mané kustumber ku tin gruponan ku no ta kla ainda ku nan badge...

Tin hende ta drumi warda te na último momentu pa yega pone preshon riba e tim atministrativo di AMAK...

Un saludo pa Helen i Linchi Saturnino, e damanan di badge di AMAK...

Trabounan tei sigui den Festival Center awó...

E festival hubenil a terminá i for di djaluna mainta trempan por a kuminsá tuma nota ku e trabounan pa transformá e sitio den e formato di Tumba grandi...

E interes pa sigui Festival di Tumba for di Ulanda, Aruba i Boneiru ta grandi...

Segun informashon e reakshon pa reservashon i kompra di ‘pay per view’ ta kanando masha bon mes, anto esaki promé ku a kòrta maishi fin di yanüari...

E fecha dje aña aki ta kai nèt bon, djis promé ku e siman di tumba kuminsá tin basta un par di hende ku ta kobra nan salario...

Promoshon via TDS, Flow i Cariflix ta kanando ala mil maravia...

E aporte dje dil di e medionan di komunikashon aki ta masha importante mes pa AMAK pasó ta nan ta yuda kubri gastunan i tambe ta e ganashi ku ta keda kompartí den pago i premiashon di artistanan....

Ma tuma nota di un diskushon importante djadumingu último entre algun persona ku tabata diskutí ta ki fórmula un kompositor i su kantante tei traha awor ku tin un outo tambe komo premio...

Segun ma komprondé ku AMAK mes a traha un proposishon pa esaki...

Pero na final ta e kompositor i su kantante tin ku sera nan akuerdo pa hasi esaki posibel...

E ganadó di e kampaña pa gana karchi Red Carpet a bin tuma su premio ayera i a keda sumamente kontentu ku esaki...

Bon nos tei move, awe nochi nos tin e intenshon di kuminsá move e ensayonan pa wak kon leu bandanan ta, tin algun ku ta kurú ainda, miéntras ku otronan a duna e informashon ku nan ta bastante leu ku esaki...

Te mañan ku Dios ke!...