Felis dia!...

Awe tin reunion urgente i importante di AGKK huntu ku su miembronan...

Henny ta na kareda pa e kaba di regla e último detayenan pa e gruponan di Karnaval i tambe pa nan kaba di desifrá e numerashon di gruponan...

Tin diferente grupo ku ta sea kompartí banda ku otro loke ta pone ku mester atendé e pida aki tambe...

Un punto interesante ta kon a para e dos gruponan ku a menshoná ku nan tin e artista ‘Poke’ den Marchanan...

Tabatin un diskushon si e artista lo por presentá durante di marcha si òf no...

Tei buska informashon riba esaki...

Trabounan ta tumando lugá den Festival Center i pa awe nochi AMAK i su partnernan lo tin un rueda di prensa kaminda nan lo kaba di duna e último detayenan pa loke ta trata e Festival ku ta kuminsá djaluna awor...

Na Aruba e rueda di prensa di AMAK a risibí un interes masha grandi mes...

AMAK a keda impreshoná pa e aseptashon total ku tin na Aruba pa nos Festival di Tumba...

Durante dje bishita na Aruba AMAK a probechá mesora pa papia ku e hefe di Departamento di Kultura di Aruba pa nan kuminsá tramitá un interkambio Kultural entre e dos paisnan durante di temporada di Karnaval...

Ounke ku e fechanan ta kai pareu ku esnan di Caiso and Soca Monarch, e festival di kalipso i roadmarch di Aruba, tòg e interes tei pa bishitá e festival riba dia dje gran final na Kòrsou...

Na Aruba otro siman djabièrnè lo tin e final di Caiso i djasabra nan ta organisá e final di Soca Monarch ...

Ayera Digicel a tene un enkuentro ameno ku e partisipantenan di Reina, Prens i Pancho adulto di Karnaval 2020 ...

E partisipantenan pa Reina di Karnaval ta 6: Kimberly Martis, Naftaley Pieternella, Angelique Girigori, Ruyenka Koeyers, Nissah Libiee i Ryandra Cicilia...

Pa Prens i Pancho tin 6 duo: 1. Ruwandy Regales i Quinten Brunken; 2. Marvin Martina i Edsert Elizabeth; 3. Engelbert Kramers i Friefabian Plantijn; 4. Sergie Beltran i Jordon Anthony, 5. Shuwender Rosini i Jonathan Walle por último duo number 6. Rigshendell Fernando i Enurgel Isabella...

Elekshon di Reina, Prens i Pancho adulto ta tuma lugá djasabra awó den sala di eksibishon di WTC...

Manera nos a splika ayera di e eksposishon ku ta pendiente pa tuma lugá den Sambil, ayera nos a risibí invitashon pa e evento aki...

‘Tumba Kings and Queens Exposition’ ta nòmber dje eksposishon ku ta bai keda habri ofisialmente djabièrnè anochi  den e zona di Emprendedo na Sambil...

Bale la pena pa bo  bishita Sambil i bai wak e eksposishon aki...

Ayera nochi Radio MAS tabatin un tremendo programa  relashoná ku Festival di Tumba  i den e kaso aki dediká na e baluarte  Rignald Recordino...

Hopi historia i anektoda a keda kompartí durante dje programa...

Awe mèrdia Hermanito i Glenn Thomas lo ta di bishita serka Melania den e programa ‘Trai Merdia’, nan lo bai elaborá riba Festival di Tumba, algu ku bo mester wak i no mag pèrdè esaki...

Glenn Thomas e aña aki lo presentá su di 20 edishon di ‘Zongo’, bispu di Gran Marcha tradishonalmente Glenn ta presentá e programa karga ku tumba fo’i anochi mitar di 10 te ku mainta ora solo kanta ‘Kokoyoko’...

Perseveransia ta e palabra perfekto pa deskribí e trabou i presentashon di Glenn Thomas i Hermanito pa loke ta trata Karnaval di Kòrsou i Festival di Tumba...

Entrante awe ora ku  brass kuminsá ensayá ku e diferente bandanan e interes pa asistí na ensayo ta lanta mes serka e fanátikonan di banda...

Antes e interes tabat’ei for di momentu ku ta harma e tumbanan, aworakí un gran mayoria ke skucha e tumbanan ora ku brass tambe a kuminsá ensayá ku e bandanan...

Trabounan den Festival Center ta tumando lugá i ma komprondé ku tin un empresa ku no ta masha kontentu ku sierto desishonnan ku a keda tumá ...

A terminá e kombenio ku tabatin e último añanan ku un empresa ‘stima’ i awor ta hasiendo ‘todo por todo’ pa tòg duna e empresa un ‘piet’, pero AMAK parse no ta masha di akuerdo ku esaki i ta para ariba ku mester por baha gastunan...

Nos tei move, tabata un plaser te mañan ku Dios ke!...